11 кастрычніка ў бібліятэцы адбудзецца прэзентацыя серыі кніг «Паэты планеты». Шэдэўры сусветнай паэзіі цяпер даступныя па-беларуску!
Выдавец Зміцер Колас разам з групай вядомых беларускіх літаратурных перакладчыкаў заснаваў паэтычную серыю кніг “Паэты планеты”.
З друку ўжо выйшлі першыя восем кніг. Сярод іх − творы самай знакамітай паэткі Старажытнай Грэцыі Сапфо, непаўторнага паэта персідскай мовы, аўтара чатырохрадкоўяў Умара Хаяма, яркага прадстаўніка італьянскага Адраджэння Петраркі, “караля французскай паэзіі” Рансара, майстра санетнай формы Шэкспіра, вялікага нямецкага паэта Гётэ, пачынальніка новай паэзіі Рыльке, а таксама чылійскай паэткі, лаўрэата Нобелеўскай прэміі Габрыэлы Містраль.
Падаецца сусветная лірыка розных эпох у найлепшых перакладах прадстаўнікоў некалькіх перакладчыцкіх пакаленняў. У найбліжэйшы час чакаецца выданне паэтычных шэдэўраў Бадлера, Гёльдэрліна, Гейнэ, Апалінэра, Эдгара По, Яна Каханоўскага, Кітса, Катры Валы… Усяго разам мяркуецца выдаць каля 75 кніг серыі.
Усе выданні маюць зручны кішэнны фармат і арыгінальнае афармленне, распрацаванае Марцінам Русецкім. Кнігі паэтычнай серыі адрасуюцца шырокаму колу чытачоў, а найперш настаўнікам і навучэнцам сярэдніх школ, выкладчыкам і студэнтам універсітэтаў.
Прэзентацыя пачнецца а 16-й гадзіне ў галерэі “Лабірынт” (3-ці паверх).
Тэлефоны для даведак: (8 017) 293 29 80, 293 27 56. Е-mail: pr@nlb.by
