26 мая ў галерэі “Лабірынт” Нацыянальнай бібліятэкі Беларусі адбылася прэзентацыя кнігі “Туристическая мозаика Беларуси”.
Арганізатары мерапрыемства – Інстытут мастацтвазнаўства, этнаграфіі і фальклору імя К. Крапівы Нацыянальнай акадэміі навук Беларусі і Нацыянальная бібліятэка Беларусі.
Кніга з’яўляецца вынікам інавацыйнага праекта, выкананага ў 2006–2008 гг. па заказе Міністэрства спорту і турызму Рэспублікі Беларусь. Выданне выйшла ў мінскім выдавецкім доме “Беларуская навука” тыражом у 3 тысячы экзэмпляраў.
Аўтары кнігі прадставілі канцэпцыю развіцця турызму ў Беларусі на аснове 52 лакальных раёнаў комплекснай гісторыка-культурнай спадчыны Беларусі. Выданне з’яўляецца своеасаблівым даведнікам па краіне і ўяўляе каштоўнасць не толькі для работнікаў сферы турызму, але і для простых беларусаў, якія цікавяцца гісторыяй, традыцыйнай культурай, інфармацыяй пра выдатныя мясціны, народныя рамёствы і майстроў народнай творчасці Беларусі.
Адкрыла мерапрыемства першы намеснік дырэктара Нацыянальнай бібліятэкі Беларусі па абслугоўванні карыстальнікаў і ідэалогіі Алена Далгаполава. У прэзентацыі ўзялі ўдзел аўтарская калегія выдання “Туристическая мозаика Беларуси” – Аляксандр Лакатко, Вольга Князева, Яўген Марозаў, Вольга Ізотава; старшыня грамадскага наглядальнага камітэта па ахове гісторыка-культурнай спадчыны пры Міністэрстве культуры Рэспублікі Беларусь Анатоль Бутэвіч; галоўны рэдактар Рэспубліканскага выдавецкага дома “Беларуская навука” Георгій Кісялёў.
Аўтар-складальнік і навуковы рэдактар кнігі “Туристическая мозаика Беларуси”, дырэктар Інстытута мастацтвазнаўства, этнаграфіі і фальклору імя К. Крапівы, член-карэспандэнт Нацыянальнай акадэміі навук Беларусі Аляксандр Лакатко перадаў у дар Нацыянальнай бібліятэцы Беларусі кнігу з аўтографамі аўтарскай калегіі выдання.
 |
 |
 |
 |
 |
 |
 |
 |
 |
 |
 |
