З 26 мая па 5 ліпеня ў Нацыянальнай бібліятэцы Беларусі (3-ці паверх, кальцавы калідор) арганізавана выстаўка “41-шы не змеркне ніколі”, прысвечаная 70-годдзю пачатку Вялікай Айчыннай вайны і гераічнай абароны Брэсцкай крэпасці.
Мінула 70 гадоў з таго дня, калі досвіткам 22 чэрвеня 1941 г. нацысцкая Германія вераломна напала на Савецкі Саюз. Пачалася вайна, якая страшнай віхурай пранеслася па лёсах некалькіх пакаленняў савецкіх людзей і пакінула свой непазбыўны след на нашай беларускай зямлі. Для беларусаў, як і іншых народаў былога СССР, гэта Дзень Памяці і Смутку.
Вайна прынесла небывалыя бедствы, пакуты і разбурэнні. На тэрыторыі Беларусі за гады акупацыі фашысты па-зверску забілі каля 2,7 млн грамадзян, каля 380 тыс. вывезлі на катаржныя работы ў Нямеччыну. Было спалена 9,2 тыс. вёсак, з іх 5 295 разам з жыхарамі. Да канца вайны ў развалінах ляжалі ўсе гарады і раённыя цэнтры Беларусі, варварскаму разбурэнню падвергліся практычна ўсё ўстановы навукі, адукацыі, культуры, аховы здароўя.
Пачатковы перыяд вайны быў вельмі трагічны. Цэлы шэраг складанейшых знешніх і ўнутраных палітычных прычын, вераломны характар нападзення Германіі на Савецкі Саюз, значная перавага ворага на галоўных напрамках абумовілі буйныя няўдачы Чырвонай Арміі ў пачатковы перыяд вайны.
Улетку 1941 года вораг здолеў акупіраваць беларускую зямлю. Аднак першыя дні, тыдні і месяцы лета 1941 г. прадэманстравалі і першыя парасткі будучай Перамогі. Менавіта ў першых баях на беларускай зямлі быў пакладзены пачатак зрыву фашысцкага плана “вокамгненнай вайны”.
Свой годны ўклад у дасягненне нялёгкай Перамогі над ворагам зрабіла брэсцкая зямля. Усяму свету вядомы бессмяротны подзвіг Брэсцкай крэпасці, якую штурмавала элітная 45-я пяхотная дывізія праціўніка і іншыя часткі пры магутнай падтрымцы авіяцыі і буйнакалібернай артылерыі. Аднак ні бязлітасныя бамбардзіроўкі, ні артылерыйскія абстрэлы, ні бесперапынныя атакі гітлераўцаў, ні голад і смага не зламалі волі абаронцаў крэпасці. Амаль усе ўдзельнікі абароны загінулі, але яны здолелі амаль на месяц скаваць значныя сілы ворага, нанесці яму адчувальныя страты. Крэпасць-герой стала сімвалам масавага подзвігу і гераічнасці нашых воінаў.
70-годдзю пачатку Вялікай Айчыннай вайны і гераічнай абароны Брэсцкай крэпасці Нацыянальная бібліятэка Беларусі прысвячае тэматычную кніжную выстаўку “41-шы не змеркне ніколі”. У экспазіцыі прадстаўлена больш за 200 кніг, якія адлюстроўваюць падзеі адной з самых кровапралітных войнаў у гісторыі чалавецтва. Асобны раздзел прысвечаны Брэсцкай крэпасці: гэта кнігі пра яе герояў, мастацкія творы, манаграфіі, альбомы, схемы і карты.