19 верасня ў бібліятэцы адбылася прэзентацыя кнігі доктара гістарычных навук Лайлы Ахметавай “1941. Брэсцкая крэпасць. Казахстан”.
Галоўная мэта мерапрыемства, арганізаванага Нацыянальнай бібліятэкай Беларусі, Пасольствам Рэспублікі Казахстан у Рэспубліцы Беларусь пры садзейнічанні выдавецтва “Беларуская энцыклапедыя імя Петруся Броўкі”, – выразіць павагу і падзяку ветэранам Вялікай Айчыннай вайны, прыцягнуць увагу шырокай грамадскасці да пытанняў патрыятычнага выхавання моладзі. Бо павага да ветэранаў і клопат пра іх – трывалая аснова сувязі пакаленняў.
Лайла Ахметава, доктар гістарычных навук, прафесар кафедры ЮНЕСКА, міжнароднай журналістыкі і медыя ў грамадстве Казахскага нацыянальнага ўніверсітэта імя аль-Фарабі – апісала ў сваёй працы падзеі прадваенных гадоў і 1941 года ў Брэсцкай крэпасці, а таксама ўдзел у іх казахскіх салдат. Больш за пяцьсот імёнаў казахстанцаў, якія абаранялі Брэсцкую крэпасць падчас Вялікай Айчыннай вайны, чорным па белым упісаны ва ўнікальную кнігу.
З прывітальным словам выступіў Надзвычайны і Паўнамоцны Пасол Рэспублікі Казахстан у Рэспубліцы Беларусь Ергалі Булегенаў. Ён выказаў словы падзякі аўтару кнігі, падкрэсліўшы асаблівую каштоўнасць праведзенай працы. "Тэма патрыятызму і адзінства народаў у часы Вялікай Айчыннай вайны вельмі важная і актуальная менавіта сёння, калі ў многіх краінах ідзе перапісванне і скажэнне гісторыі той вайны, праз якую прайшлі нашы дзяды. Але ў Казахстане, таксама як і ў Беларусі, стаўленне да Дня Перамогі асабліва трапяткое – нашы краіны вельмі моцна пацярпелі ў гады вайны, дзясяткі тысяч казахстанцаў плячом да пляча з беларусамі ваявалі за агульную Перамогу", – адзначыў спадар пасол.
"Часам на патрыятычных мерапрыемствах адчуваеш сябе як не ў сваёй талерцы, – падзяліўся старшыня праўлення Беларускай грамадскай арганізацыі ветэранаў Камітэта дзяржаўнай бяспекі «Гонар» Аляксей Васільеў. – Брэсцкая крэпасць – гэта знак мужнасці! А сёння ўсё часцей прыходзіцца чуць такія словы, як «знакавая падзея», «брэнд» і г.д. Важна, каб Памяць не была выпусташана, не губляла сувязь з рэальнымі людзьмі і іх лёсамі. І гэта ключавая задача сёння стаіць перад кожным з нас".
Аўтар кнігі, Лайла Ахметава, у сваім выступленні падзякавала беларускім пошукавікам, якія дапамагалі ў зборы інфармацыі, удакладнялі ў архівах Беларусі, музеі Брэсцкай крэпасці. У знак удзячнасці яна перадала ў дар Нацыянальнай бібліятэцы Беларусі камплект выданняў "1941. Брестская крепость. Казахстан".
Кніга – памяць, кніга – павага, кніга – сімвал. Сімвал агульнай Перамогі, якая стала рэальнасцю дзякуючы намаганням і самаахвяраванню безыменных герояў, якія былі адарваны ад Радзімы і аддалі сваё жыццё за агульны мір на нашай беларускай зямлі. І, здавалася б, далёкія Брэсцкая крэпасць і Казахстан так выразна становяцца побач, калі пачынаеш разумець, што тая бяда-вайна не мела меж, як і гераізм загінуўшых салдат.
 |
 |
 |
 |
 |
 |
 |
 |
 |
|
|
|
|
