11 лютага а 11-й гадзіне ў межах XVIII Мінскай міжнароднай кніжнай выстаўкі-кірмашу “Кнігі Беларусі – 2011” на стэндзе Нацыянальнай бібліятэкі Беларусі адбудзецца прэзентацыя інвестыцыйных праектаў у галіне захавання і папулярызацыі нацыянальнай кніжнай спадчыны.
Нацыянальная бібліятэка Беларусі як найбуйнейшая навуковая бібліятэка рэспублікі прадставіць свой вопыт навукова-выдавецкай і праектнай дзейнасці ў галіне захавання і папулярызацыі кніжнай спадчыны Беларусі. Значнасць вынікаў дзейнасці бібліятэкі тлумачыцца тым, што яна мае місію збіраць, захоўваць і даваць у карыстанне грамадству самы вялікі ў краіне ўніверсальны кніжны фонд, у тым ліку самы буйны збор рукапісаў, старадрукаў і рэдкіх выданняў.
Багацце кніжнай спадчыны ў зборах Нацыянальнай бібліятэкі Беларусі падштурхнула да больш цеснага супрацоўніцтва з ёю не толькі такія ўплывовыя міжнародныя арганізацыі, як ЮНЕСКА, але і камерцыйныя структуры, прадстаўнікі якіх, як плануецца, таксама выступяць падчас прэзентацыі.
Адным з апошніх праектаў, вынікі якога прэзентуюцца на міжнароднай кніжнай выстаўцы, стала падрыхтоўка і выданне серыі календароў, якія шматбакова рэпрэзентуюць багацце і разнастайнасць кніжнай спадчыны Беларусі. Іх выпуск – вынік працяглай сумеснай працы Нацыянальнай бібліятэкі Беларусі і Белінвестбанка. У выдадзенай серыі календароў праз даўнюю беларускую кнігу ярка і шматгранна паказаны вобраз нашай краіны – дзяржавы, скіраванай на найноўшыя тэхнічныя і навуковыя дасягненні (што бачна ў спадчыне першадрукароў Ф. Скарыны, І. Фёдарава, П. Мсціслаўца і інш.), з высокім узроўнем адукаванасці (беларускія навуковыя і асветніцкія выданні), прававой (вядомыя на ўсю Еўропу помнікі права) і верацярпімай (найпрыгажэйшыя выданні розных канфесій).
Безумоўна, падрыхтоўка і выпуск серыі календароў стане асновай для шматгадовага плённага супрацоўніцтва ўстаноў культуры і банкаўскіх структур нашай краіны па захаванні і папулярызацыі нацыянальнай культурнай спадчыны.
У працяг паспяхова рэалізаванага праекта Нацыянальная бібліятэка Беларусі падрыхтавала цэлы шэраг інвестыцыйных праектаў, скіраваных на захаванне і папулярызацыю кніжнай спадчыны Беларусі. Зацікаўленасць у сумеснай дзейнасці ў гэтым напрамку выказана шэрагам бібліятэк, музеяў і архіваў краіны, а таксама ўстановамі навукі і адукацыі, выдаўцамі і камерцыйнымі структурамі. Падчас XVIII Мінскай міжнароднай кніжнай выстаўкі-кірмашу адбудзецца першая прэзентацыя поўнага комплексу інвестыцыйных праектаў.
XVIII Мінская міжнародная кніжная выстаўка-кірмаш “Кнігі Беларусі – 2011” працуе ў Нацыянальным выставачным цэнтры БелЭКСПА па адрасе: г. Мінск, вул. Я. Купалы, 27.
Тэлефон для даведак: 293-27-67.
www.nlb.by
Е-mail: pr@nlb.by