17 кастрычніка ў Нацыянальнай бібліятэцы Беларусі адбылася прэзентацыя факсімільнага выдання ўнікальнага помніка беларускага летапісання – знакамітага Баркалабаўскага летапісу.
Выданне факсіміле летапісу ў поўным аб’ёме, у якім ён захаваўся да нашага часу, адбылося на Беларусі ўпершыню і стала магчымай дзякуючы намаганням і плённай працы прадстаўнікоў Нацыянальнай бібліятэкі, Нацыянальнай акадэміі навук, выдавецтва “Беларуская Энцыклапедыя імя Петруся Броўкі”, федэральнай нацыянальна-культурнай аўтаноміі “Беларусы Расіі” і Магілёўскага абласнога выканаўчага камітэта.
Факсімільнае выданне ўяўляе сабой камплект з дзвюх кніг, якія ўключаюць факсімільна ўзноўлены ўнікальны беларускі летапіс, транслітэраваны тэкст рукапіснага помніка і матэрыялы яго гісторыка-культурнага даследавання. Факсіміле дазволіла максімальна аўтэнтычна ўзнавіць знешні выгляд і арыгінальную структуру кніжнага помніка, вярнуць яго ў культурную прастору Беларусі.
Як расказала пад час прэзентацыі галоўны рэдактар выдавецтва “Беларуская Энцыклапедыя імя Петруся Броўкі” Ларыса Языковіч, ідэя праекта ўзнікла яшчэ летась, а працавалі над яго рэалізацыяй з красавіка па чэрвень, таму што мусілі забяспечыць выданне факсіміле да Дня беларускага пісьменства, што святкавалі ў Быхаве ў верасні. (Неабходна ўзгадаць, што Баркалабаўскі летапіс ўвекавечылі помнікам пад час святкаванняў.)
У сваю чаргу дырэктар Нацыянальнай бібліятэкі Раман Матульскі, атрымаўшы з рук Ларысы Языковіч экзэмпляр факсіміле летапісу для бібліятэкі, падкрэсліў, што ў Беларусі выдаецца многа вартых кніг, частка з іх у якасці падарункаў пачэсным гасцям краіны пакідае яе межы, але трэба клапаціцца пра тое, каб іх экзэмпляры былі захаваны ў буйных бібліятэках краіны, “каб праз сто ці нават пяцьсот гадоў (як мы звяртаемся да спадчыны Францыска Скарыны) хто-небудзь меў магчымасць узяць у рукі кнігу нашага часу і судзіць пра нашу эпоху”.
Баркалабаўскі летапіс з’яўляецца каштоўным помнікам беларускай культуры, адным з найбольш поўных і насычаных звесткамі летапісных зводаў, што распавядаюць пра мінулае нашага краю і беларускага народа. Яго факсімільнае выданне будзе карысным для даследчыкаў айчыннай гісторыі, кніжнай культуры, беларускай мовы, рэлігіі, а таксама для тых, хто цікавіцца беларускай кніжнай спадчынай.
Тэлефон для даведак: (8 017) 293 27 56.
 |
 |
 |
 |
 |
 |
 |
 |
 |
 |
