19 лістапада ў галерэі “Лабірынт” адбылася прэзентацыя выдання “Радзівілы. Альбом партрэтаў XVIII–XIX стагоддзяў”.
Мерапрыемства было арганізавана выдавецтвам “Беларуская Энцыклапедыя імя Петруся Броўкі” сумесна з Нацыянальнай бібліятэкай Беларусі.
У мэтах адраджэння мастацка-маральных традыцый, памнажэння нацыянальна-культурнага здабытку нашай краіны выдавецтва “Беларуская Энцыклапедыя імя Петруся Броўкі” выпусціла кнігу “Радзівілы. Альбом партрэтаў XVIII–XIX стагоддзяў”.
Выданне прадстаўніцкага класа ўключае ў сябе 165 старонак факсімільных чорна-белых партрэтных гравюр і малюнкаў з гістарычнымі каментарыямі. Матэрыялы для выдання перадалі замежныя партнёры – сям’я князёў Радзівілаў, Каралеўскі замак Варшавы, нацыянальныя музеі Кракава, Нацыянальны мастацкі музей Літвы. Арыгінал альбома, напісаны на латыні, захоўваецца ў Нацыянальным гістарычным архіве Беларусі. Гэта ўнікальнае выданне, адзінае з дзевяці вядомых падобнага роду.
На прэзентацыі выступілі першы намеснік міністра інфармацыі Рэспублікі Беларусь Лілія Ананіч, намеснік міністра культуры Рэспублікі Беларусь Тадэвуш Стружэцкі, прадстаўнікі роду Радзівілаў – князі Мацей і Мікалай Канстанцін II, дырэктар Нацыянальнай бібліятэкі Беларусі Раман Матульскі, дырэктар выдавецтва “Беларуская Энцыклапедыя імя Петруся Броўкі” Таццяна Бялова, намеснік дырэктара па навуковай рабоце ГУ “Нацыянальны гісторыка-культурны музей-запаведнік «Нясвіж»” Галіна Кандрацьева, аўтар-даследчык выдання “Радзівілы. Альбом партрэтаў XVIII–XIX стагоддзяў”, кандыдат мастацтвазнаўства Вольга Бажэнава. У мерапрыемстве ўзялі ўдзел прадстаўнікі міністэрстваў, ведамстваў, дыпламатычнага корпуса, бібліятэк, музеяў, архіваў Рэспублікі Беларусь.
Дырэктар выдавецтва “Беларуская Энцыклапедыя імя Петруся Броўкі” Таццяна Бялова перадала ў дар Нацыянальнай бібліятэцы Беларусі экзэмпляр альбома “Радзівілы. Альбом партрэтаў XVIII–XIX стагоддзяў”.
 |
 |
 |
 |
 |
