27 жніўня а 15-й гадзіне ў зале адукацыйных тэхналогій (3-ці паверх, пам. 346) адбудзецца прэс-канферэнцыя, прысвечаная перавыданню Тураўскага Евангелля (XI стагоддзе) – самага старажытнага кніжнага помніка Беларусі.
Мерапрыемства пройдзе напярэдадні Дня ведаў і Дня беларускага пісьменства.
Каб даць магчымасць шырокаму колу даследчыкаў, навучэнцаў і аматараў гісторыі пазнаёміцца з тэкстам і знешнім выглядам Тураўскага Евангелля, кампанія Xerox і Нацыянальная бібліятэка Беларусі пры падтрымцы Апякунскага савета бібліятэкі рэалізавалі праект па перавыданні помніка ў выглядзе факсіміле.
На мерапрыемстве шырокай грамадскасці будзе прадстаўлена факсімільнае выданне знакамітага рукапісу, падрыхтаванае з захаваннем усіх асаблівасцей арыгінала і ў суправаджэнні гістарычных і кнігазнаўчых даследаванняў. Копіі ўнікальнага помніка славянскага пісьменства, выдадзеныя з выкарыстаннем найноўшых тэхналогій, плануецца перадаць айчынным і замежным установам навукі, культуры і адукацыі.
Тэлефон для даведак: (8 017) 293 27 56.
Е-mail: pr@nlb.by
