Пры падтрымцы Міністэрства інфармацыі краіны ў Выдавецкім доме “Звязда” пабачыў свет альманах літаратуры народаў СНД “Сугучча” (“Созвучие”).
Мінск становіцца сапраўднай пляцоўкай, якая аб’ядноўвае літаратурныя сілы краін СНД. Сведчаннем таго з’яўляюцца традыцыйныя вераснёўскія міжнародныя “круглыя сталы” з удзелам замежных пісьменнікаў, бібліятэка кніг “Сугучча сэрцаў” у 11 тамах, якая была выдадзена ў 2013 годзе, шырокая праца па прадстаўленні ў літаратурна-мастацкай перыёдыцы перакладаў з паэзіі і прозы розных нацыянальных літаратур. Новы крок – заснаванне гадавога альманаха “Сугучча” (“Созвучие”).
– У склад міжнароднага рэдакцыйнага савета гэтага адмысловага “томіка дружбы”, – расказвае адзін з укладальнікаў альманаха паэт і перакладчык Алесь Бадак, – увайшлі старшыня Саюза пісьменнікаў Беларусі Мікалай Чаргінец, беларускія пісьменнікі Мікола Мятліцкі, Таццяна Сівец, Іван Чарота, Аляксей Чарота, пісьменнікі з Расіі Валерый Казакоў, Алесь Кажадуб, азербайджанскі паэт Чынгіз Алі аглу, старшыня Саюза пісьменнікаў Арменіі Эдвард Мілітанян, чэчэнская паэтэса Лула Куні, старшыня Каўказскага Дома перакладаў Марат Гаджыеў, старшыня Саюза перакладчыкаў Казахстана Кайрат Бакбергенаў… Менавіта такая супольнасць і паспрыяла зладжанай працы па стварэнні “Сугучча”. У першы, сёлетні, выпуск увайшлі паэзія і проза Азербайджана, Арменіі, Беларусі, Казахстана, Малдовы, Расіі, Таджыкістана, Узбекістана, Украіны. Кыргызстан прадстаўлены нечаканым дыялогам з Чынгізам Айтматавым “Жанчыны ў нашых лёсах, ці Вечар паэзіі для дваіх”. Суразмоўца славутага пісьменніка – народны паэт Казахстана Мухтар Шаханаў. А яшчэ пра літаратуру гэтай старонкі – у артыкуле Георгія Хлыпенкі “Славянскі свет у часопісе «Литературный Кыргызстан»”. У казахстанскім раздзеле – эсэ Міколы Мятліцкага пра Абая, над перакладамі якога беларускі творца працаваў для ранейшага выдання асобнай кнігай. Побач – вершы ўраджэнкі Беларусі Любові Шашковай, якую сёння ведаюць як адну з цікавых рускіх паэтэс Казахстана.
“Сугучча” сваімі мастацкімі тэкстамі нагадвае і пра літаратуру ранейшых дзесяцігоддзяў: размова – пра публікацыі пісьменнікаў, якія досыць даўно заваявалі аўтарытэт у чытачоў і зараз працягваюць працаваць на ніве прыгожага пісьменства. Гэта і Уладзімір Крупін, і Іон Друцэ, і Мікалай Дабранраваў, і Галіна Тарасюк, і Валерый Казакоў.
Аўтар публікацыі: Сяргей Шычко.
Крыніца: газета “Звязда”
