11 студзеня ў бібліятэцы адбыліся заняткі “Нацыянальная бібліятэка Беларусі – дом, дзе жывуць кнігі” ў рамках праекта “У госці да кніг” для 1 “А” класа мінскай сярэдняй школы № 137 імя П.М. Машэрава.
На занятках дзеці пазнаёміліся з будынкам самай вялікай бібліятэкі краіны і даведаліся, як арганізавана ў ёй кніжнае жыццё. Маленькія госці ўбачылі чытальныя залы, галерэі і музей кнігі.
Асаблівая ўвага была нададзена тэме буквароў. Першая ў свеце кніга пад назвай “Буквар” была створана і надрукавана беларусамі ў 1618 годзе ў друкарні Віленскага праваслаўнага брацтва Святога Духа ў Еўе. Летась адбылося шырокае святкаванне 400-годдзя беларускага “Буквара”.
2019 год таксама юбілейны для навучальных кніг, якія адыгралі важную ролю ў гісторыі асветы ўсходнеславянскіх народаў:
- 445 гадоў таму была выдадзена “Азбука” Івана Фёдарава, украінскага, беларускага і рускага кнігадрукара і асветніка;
- 340 гадоў таму быў выдадзены “Буквар” Сімяона Полацкага, які шмат зрабіў для пашырэння асветы ў Беларусі і Расіі;
- 100 гадоў беларускай граматыцы “Зорка”, падрыхтаванай беларускім педагогам Аляксандрай Смоліч;
- 50 гадоў “Буквару” Анатоля Клышкі, які дзякуючы вялікім творчым намаганням выпрацаваў сваю асабістую методыку навучання чытанню і пісьму, што дае магчымасць гаварыць пра пачэснае месца “Буквара” ў сусветнай букварыстыцы.
Дзеткам пашанцавала, таму што да заняткаў далучыўся кандыдат культуралогіі, намеснік дырэктара па навуковай рабоце і выдавецкай дзейнасці Аляксандр Аляксандравіч Суша, які цікава распавёў пра гісторыю буквароў.
Заняткі былі арганізаваны па ініцыятыве Наталлі Аляксандраўны Амяльянік, настаўніцы пачатковых класаў вышэйшай кваліфікацыйнай катэгорыі, уладальніцы прэміі Мінгарвыканкама 2010 года ў намінацыі “Эфектыўны менеджмент – асноўны рэсурс павышэння якасці адукацыі”, пераможцы раённага этапу рэспубліканскага конкурсу прафесійнага майстэрства "Сталічны настаўнік – сталічнай адукацыі” 2017 года ў намінацыі “Пачатак пачаткаў”.
Матэрыял падрыхтаваны навукова-даследчым аддзелам кнігазнаўства.
