У рамках Года малой радзімы віртуальная чытальная зала Нацыянальнай бібліятэкі Беларусі запрашае ў чарговае займальнае падарожжа. На гэты раз яно прысвечана Віцебскай вобласці.
Трэба дома бываць часцей,
Трэба дома бываць не госцем,
Каб душою не ачарсцвець,
Каб не страціць святое штосьці.
Рыгор Барадулін.
Ажыццявіць падарожжа дапаможа карпаратыўная база даных бібліятэкараў Віцебшчыны “Прыдзвінскі край: гісторыя і сучаснасць”.
Маршруты віртуальнага падарожжа праходзяць па 21 раёну вобласці. Падчас вандроўкі суайчыннікі і замежныя госці атрымаюць інфармацыю пра гісторыю, прыродныя рэсурсы, эканоміку і іншыя напрамкі жыццядзейнасці краю.
Падарожнікаў у гістарычнае мінулае прывабяць легенды і паданні аб краі, помнікі гісторыі і культавай архітэктуры, багаты тапанімічны арсенал інфармацыйнага рэсурсу. Адукацыйная прастора вобласці прадстаўлена своеасаблівымі інфармацыйнымі партрэтамі ўстаноў адукацыі. Гасцінна адкрыюць віртуальныя дзверы перад сваімі патэнцыяльнымі наведвальнікамі турыстычныя аб'екты, базы адпачынку, пансіянаты і санаторыі. Яркімі падзеямі і дасягненнямі запомніцца культурнае і спартыўнае жыццё краю. Рэсурс дазваляе “з першых рук” пазнаёміцца з кантэнтам мясцовых друкаваных сродкаў масавай інфармацыі.
Інфармацыя пра вядомых ураджэнцаў Віцебшчыны – асабліва каштоўная частка базы даных. Сярод знакамітых людзей краю – лаўрэаты Нобелеўскай прэміі, дзяржаўныя дзеячы, сусветна вядомыя вучоныя і вынаходнікі, мастакі і майстры мастацкага слова Беларусі, а таксама людзі, якія ўпісалі сваё імя ў гісторыю самых маленькіх населеных пунктаў Прыдзвінскай зямлі.
Усе аб'екты віртуальнага інфармацыйнага падарожжа па Віцебшчыне паўстаюць праз прызму фактаграфічнай, бібліяграфічнай і паўнатэкставай інфармацыі.
У арсенале навігацыйных сродкаў базы даных – віртуальная карта вобласці, кожны раён на якой з'яўляецца кропкай доступу да інфармацыі пра яго. Дапамогуць у інфармацыйным падарожжы і гіперспасылкі паміж структурнымі часткамі рэсурсу і ў канцы даведачных артыкулаў.
Інфармацыйнае падарожжа па Віцебскай вобласці будзе незабыўным.
Віртуальная чытальная зала і далей будзе знаёміць вас з цікавымі краязнаўчымі праектамі рэгіянальных бібліятэк і іншых устаноў.
Матэрыял прадастаўлены аддзелам карпаратыўнага ўзаемадзеяння.