Дзякуючы падтрымцы праекта MOST загадчыца сектара навукова-праектнай работы навукова-даследчага аддзела кнігазнаўства Таццяна Сапега прайшла стажыроўку ў Польшчы.
Праект MOST (Mobility Scheme for Targeted People-to-People-Contacts / Праграма мабільнасці для мэтанакіраваных міжасобасных кантактаў) – праект Еўрапейскага саюза, накіраваны на пашырэнне кантактаў паміж грамадзянамі Беларусі і ЕС з мэтай абмену перадавым вопытам.
Асноўнымі арганізацыямі для стажыроўкі сталі Інстытут усходняга славяназнаўства Вармінска-Мазурскага ўніверсітэта ў Ольштыне, Інстытут кнігі ў Кракаве, Інстытут кнігі і чытання Нацыянальнай бібліятэкі ў Варшаве.
Таццяна Сапега прыняла ўдзел у рабоце XXI Міжнароднай славянскай канферэнцыі “Польска-ўсходнеславянскія моўныя, літаратурныя і культурныя кантакты”, арганізаванай Інстытутам усходняга славяназнаўства Вармінска-Мазурскага ўніверсітэта. У рамках канферэнцыі яна выступіла з дакладам “Выданні з друкарні горада Каліш у фондзе Нацыянальнай бібліятэкі Беларусі. Польска-беларускія кантакты ў кнігах”. У Інстытуце кнігі ў Кракаве і Інстытуце кнігі і чытання Нацыянальнай бібліятэкі ў Варшаве Таццяна Андрэеўна набыла вопыт работы і ўсталявала прафесійныя кантакты.
З мэтай азнаямлення з навуковай і асветніцкай дзейнасцю Таццяна наведала ў Бібліятэку Ягелонскага ўніверсітэта, Бібліятэку Чартарыйскіх, Навуковую бібліятэку Польскай акадэміі мастацтваў і Польскай акадэміі навук у Кракаве, Нацыянальную бібліятэку ў Варшаве, Бібліятэку Варшаўскага ўніверсітэта і інш. Для азнаямлення з інавацыйнымі методыкамі стварэння музейных экспазіцый і працы з музейнымі наведвальнікамі Таццяна Андрэеўна была ў Нацыянальным музеі ў Кракаве, музеі Ягелонскага ўніверсітэта, Доме Яна Матэйкі, Музеі імя графа Эмерыка Утэн-Чапскага, Музеі гісторыі польскіх яўрэяў, Музеі Фрэдэрыка Шапена і інш.
У рамках стажыроўкі факсімільнае выданне “Буквар”, выпушчанае Нацыянальнай бібліятэкай Беларусі да 400-годдзя першага “Буквара”, было перададзена ў фонды Вармінска-Мазурскага ўніверсітэта ў Ольштыне, Нацыянальнага музея ў Кракаве, Бібліятэкі Варшаўскага ўніверсітэта і Музея арт-кнігі ў Лодзі.
Дзякуючы стажыроўцы, якая прайшла з 25 чэрвеня па 22 ліпеня 2019 года, былі набыты новы вопыт і веды; наладжана супрацоўніцтва з замежнымі калегамі; адбыліся перамовы з польскімі партнёрамі па арганізацыі сумесных праектаў; азнаямленне з інавацыямі, прадуктамі, перадавымі тэхналогіямі ў бібліятэчна-музейнай сферы; а таксама ў польскіх арганізацыях былі прадстаўлены дасягненні і вынікі работы навукова-даследчага аддзела кнігазнаўства Нацыянальнай бібліятэкі Беларусі.
Матэрыял прадстаўлены навукова-даследчым аддзелам кнігазнаўства.