4 мая, напярэдадні Дня Перамогі, экскурсію з цыкла “Славутыя імёны Бацькаўшчыны”, прысвечаную творчасці перыяду Вялікай Айчыннай вайны А. Куляшова, М. Танка, П. Панчанкі, наведалі навучэнцы Мінскага дзяржаўнага прафесіянальна-тэхнічнага каледжа дэкаратыўна-прыкладнога мастацтва імя М.А. Кедышкі.
Экскурсанты пазнаёміліся з архітэктурай, мастацкім афармленнем Нацыянальнай бібліятэкі, сістэмай заказу, дастаўкі і выдачы літаратуры. Частка экскурсіі прайшла ў выглядзе інтэрактыўных заняткаў, падчас якіх госці пазнаёміліся з творчасцю П. Панчанкі, А. Куляшова, М. Танка, убачылі ўнікальныя выяўленчыя дакументы, звязаныя з тэмай Вялікай Айчыннай вайны з фондаў Нацыянальнай бібліятэкі Беларусі: фотаздымкі, паштоўкі, плакаты, баявыя лісткі, рэпрадукцыі карцін, факсіміле франтавых газет. Экскурсанты – будучыя мастакі-афарміцелі – з цікавасцю вывучалі прадстаўленыя выданні і плануюць выкарыстоўваць зробленыя на экскурсіі замалёўкі і фотаздымкі для стварэння ўласных мастацкіх работ, падрыхтоўкі ў каледжы мастацкай выстаўкі, прысвечанай Дню Перамогі.
У канцы экскурсіі госці падняліся на аглядную пляцоўку і палюбаваліся Мінскам з вышыні птушынага палёту.
Запрашаем усіх, хто цікавіцца беларускай літаратурай і гісторыяй на экскурсіі “Славутыя імёны Бацькаўшчыны” па творчасці знакамітых беларусаў: Янкі Купалы, Якуба Коласа, Максіма Багдановіча, Кандрата Крапівы, Міхася Зарэцкага, Янкі Маўра, Уладзіміра Караткевіча, Васіля Быкава, Івана Шамякіна, Францішка Багушэвіча, Францыска Скарыны, Марка Шагала.
Заяўкі прымаюцца з 10.00 да 18.00 з аўторка па нядзелю.
Тэлефоны для запісу: (8 017) 293 29 66, 293 28 53.
Матэрыял пададзены аддзелам экскурсійна-метадычнай работы.