25 сакавіка 2009 года а 16-й гадзіне ў галерэі “Ракурс” Нацыянальнай бібліятэкі Беларусі (2-гі паверх) адбудзецца ўрачыстае святочнае мерапрыемства "Под небом Греции cвященной…".
У рамках правядзення Дзён грэчаскай культуры ў Рэспубліцы Беларусь з 25 сакавіка па 25 красавіка 2009 года ў Нацыянальнай бібліятэцы Беларусі будуць прадстаўлены кніжная і мастацка-дакументальная выстаўкі. Арганізатарамі праектаў выступаюць Беларускае грамадскае аб’яднанне грэкаў “ПЕЛОПОННЕС”, Пасольства Грэчаскай Рэспублікі ў Расійскай Федэрацыі, Міністэрства культуры Рэспублікі Беларусь, Міністэрства адукацыі Рэспублікі Беларусь і Нацыянальная бібліятэка Беларусі.
25 сакавіка адбудзецца ўрачыстае мерапрыемства “Под небом Греции cвященной…”, у якім з канцэртнай праграмай выступяць лаўрэат чатырох Усебеларускіх фестываляў нацыянальных культур Арцём Ахпаш, лаўрэат 7-га Рэспубліканскага фестывалю нацыянальных культур танцавальны ансамбль “Белые Крылья” цэнтра мастацкай творчасці вучняў г. Маладзечна і лаўрэат 7-га Рэспубліканскага фестывалю нацыянальных культур юная грачанка Ксенія Чалопула.
Таксама ў праграме мерапрыемства – прэзентацыя выстаўкі жывапісу мастакоў Ірыны Гілеп і Паўла Дзімітрыядзі, экспазіцыі фотаматэрыялаў, у ліку якіх выявы нацыянальных касцюмаў, музычных інструментаў, партрэты герояў нацыянальна-вызваленчага руху Грэцыі (1821-1833 гг.).
У рамках мерапрыемства ва ўрачыстай абстаноўцы Беларускім грамадскім аб’яднаннем грэкаў “ПЕЛОПОННЕС” будуць перададзены ў дарунак Нацыянальнай бібліятэцы Беларусі 25 кніг па гісторыі і культуры Грэцыі. Акрамя гэтага, пройдзе ўшаноўванне пераможцаў алімпіяды па гісторыі культуры і мовы старажытнай і сучаснай Грэцыі, якая адбылася 10 сакавіка 2009 года на базе гімназіі №3 г. Маладзечна.
Уваход цэнтральны.
Тэлeфон для даведак: 293-28-23, 293-27-67.
Е-mail: pr@nlb.by
