4 снежня ў Нацыянальнай бібліятэцы Беларусі адбыўся Першы з’езд Саюза пісьменнікаў Саюзнай дзяржавы.
Мэта мерапрыемства – далейшае пашырэнне і ўмацаванне беларуска-расійскіх літаратурных сувязей.
У рабоце з’езду прынялі ўдзел члены Саюза пісьменнікаў Беларусі і Саюза пісьменнікаў Расіі, прадстаўнікі органаў дзяржаўнага кіравання, СМІ, творчых саюзаў, устаноў культуры, адукацыі і навукі, а таксама грамадскія дзеячы і дыпламаты.
Па выніках з’езду было выбрана кіраўніцтва новага творчага саюза і вызначаны кірункі яго работы. Сустаршынямі творчага аб’яднання абраны старшыня Саюза пісьменнікаў Беларусі Мікалай Чаргінец і старшыня праўлення Саюза пісьменнікаў Расіі Валерый Ганічаў.
У рамках мерапрыемства Нацыянальная бібліятэка Беларусі арганізавала кніжную выстаўку «Супольнасць народаў – супольнасць літаратур», на якой былі прадстаўлены мастацкія, крытычныя і публіцыстычныя творы дэлегатаў з’езду. На старонках сваіх кніг пісьменнікі пакінулі памятныя запісы і аўтографы.
Для ўдзельнікаў з’езду была арганізавана экскурсія па Нацыянальнай бібліятэцы Беларусі, падчас якой госці азнаёміліся з яе інфармацыйнымі рэсурсамі, тэхнічным аснашчэннем і архітэктурна-будаўнічымі асаблівасцямі. У музеі кнігі ўвазе гасцей была прадстаўлена калекцыя рарытэтаў з фондаў бібліятэкі.
Прадстаўнікі Саюза пісьменнікаў Беларусі і Саюза пісьменнікаў Расіі перадалі ў фонд Нацыянальнай бібліятэкі Беларусі рад выданняў.