25 чэрвеня ў Нацыянальнай бібліятэцы Беларусі адбылося I пасяджэнне Кансультатыўнага савета па справах беларусаў замежжа.
Савет быў створаны пры Міністэрстве культуры Рэспублікі Беларусь у мэтах паляпшэння каардынацыі сувязей і аказання дапамогі з боку дзяржаўных органаў Рэспублікі Беларусь грамадскім арганізацыям беларусаў замежжа.
У склад савета ўвайшлі прадстаўнікі шэрага органаў дзяржкіравання, кіраўнікі беларускіх аб’яднанняў Латвіі, Літвы, Малдовы, Польшчы, Расіі, Украіны і Эстоніі, а таксама грамадскіх аб’яднанняў Беларусі.
На першым пасяджэнні абмяркоўваліся палажэнне аб кансультатыўным савеце і план яго работы, ход рэалізацыі прапаноў удзельнікаў V З’езда беларусаў свету, падрыхтоўка законапраекта “Аб суайчынніках”, а таксама правядзенне ў 2011 годзе ў Беларусі Фестывалю беларусаў замежжа.
У мерапрыемстве ўзялі ўдзел прадстаўнікі Адміністрацыі Прэзідэнта Рэспублікі Беларусь, Савета Міністраў Рэспублікі Беларусь, Міністэрства культуры Рэспублікі Беларусь, Міністэрства замежных спраў Рэспублікі Беларусь, Міністэрства адукацыі Рэспублікі Беларусь, упаўнаважаны па справах рэлігій і нацыянальнасцей, кіраўнікі грамадскіх аб’яднанняў беларусаў замежжа і інш.
Завяршылася работа першага пасяджэння экскурсіяй па Нацыянальнай бібліятэцы Беларусі, у ходзе якой госці азнаёміліся з яе работай, архітэктурна-канструкцыйнымі асаблівасцямі будынка, тэхнічным аснашчэннем, інфармацыйнымі рэсурсамі, мастацкім афармленнем інтэр’ераў.