Намеснік дырэктара бібліятэкі Аляксандр Суша прыняў удзел у міжнародным форуме “Нацыянальныя бібліятэкі і адзіная інфармацыйная прастора СНД: выклікі часу і перспектывы развіцця”, які прайшоў у Маскве.
Удзел у рабоце форуму, які адбыўся ў Расійскай дзяржаўнай бібліятэцы 12–13 красавіка, прынялі дзяржаўныя дзеячы, культуролагі, кіраўнікі і вядучыя спецыялісты нацыянальных бібліятэк Азербайджана, Арменіі, Беларусі, Казахстана, Кыргызстана, Малдовы, Расіі, Узбекістана, Таджыкістана. Сустрэча была прымеркавана да 25-годдзя стварэння СНД і Году адукацыі ў СНД. Галоўным арганізатарам форуму выступіла Бібліятэчная асамблея Еўразіі.
У адрас удзельнікаў форуму накіравалі прывітанні генеральны сакратар Міжпарламенцкай асамблеі дзяржаў – удзельніц СНД А. Сяргееў, старшыня камітэта Дзяржаўнай Думы РФ па справах Садружнасці Незалежных Дзяржаў, еўразійскай інтэграцыі і сувязях з суайчыннікамі Л. Слуцкі, выканаўчы дырэктар Міждзяржаўнага фонду гуманітарнага супрацоўніцтва дзяржаў – удзельніц СНД А. Іксанаў.
У рамках форуму прайшлі два круглыя сталы “Бібліятэчна-інфармацыйная прастора СНД: стан і перспектывы” і “Бібліятэчная адукацыя ў краінах СНД: стан і праблемы”.
А. Суша выступіў з паведамленнем аб сістэме бесперапыннай бібліятэчнай адукацыі ў Рэспубліцы Беларусь. Таксама ён прыняў удзел у дыскусіях аб рэалізацыі асноў дзяржаўнай культурнай палітыкі Расійскай Федэрацыі і перспектывах распрацоўкі аналагічнага дакумента ў Беларусі.
Удзельнікі адзначылі ўзаемную карыснасць і эфектыўнасць правядзення міжнародных навуковых канферэнцый і адукацыйных праграм у краінах СНД пры падтрымцы органаў выканаўчай улады па пытаннях культуры і адукацыі краін Садружнасці. Па выніках работы падрыхтаваны дзве рэзалюцыі, якія змяшчаюць найбольш істотныя палажэнні і рэкамендацыі, абмеркаванне якіх адбывалася ў рамках пасяджэнняў форуму.