19 красавіка ў галерэі “Лабірынт” (3-ці паверх) адбылося адкрыццё выстаўкі графічных работ Алега Яхніна.
Нацыянальная бібліятэка сумесна з галерэяй графікі “Кніжны салон” (г. Мінск) пры падтрымцы Фонду “Мастацтва графікі” (г. Санкт-Пецярбург) прадставілі выстаўку мастака.
Заслужаны мастак Расіі прафесар Алег Яхнін з’яўляецца аўтарам і кіраўніком звыш 40 міжнародных праектаў, у тым ліку Міжнароднай трыенале графікі ў Санкт-Пецярбургу.
На рахунку мастака ўдзел у 500 выстаўках у Расіі і за мяжой (Германіі, Францыі, Кітаі і інш.), каля 70 персанальных выставак. Яго карціны і ілюстрацыі ўпрыгожваюць мастацкія галерэі многіх краін, у тым ліку і Трацякоўскую галерэю. За развіццё і ўдасканаленне графічнага мастацтва, неацэнны ўклад у выхаванне маладых мастакоў Алег Яхнін удастоены прафесійнай кніжнай прэміі “Кніжны чарвяк”. У 2008 годзе ён прызнаны Чалавекам года Санкт-Пецярбурга.
Шматгадовая плённая праца звязвае мастака з дзіцячымі літаратурнымі выданнямі, такімі як “Детгиз”, “Малыш”, “Детская литература”, часопісамі “Искорка”, “Костер”, “Мурзилка”. Апошнія гады мастак актыўна супрацоўнічае з пецярбургскім выдавецтвам “Вита Нова”, якія спецыялізуюцца на выпуску малатыражных калекцыйных выданняў. Тут з яго ілюстрацыямі выйшаў раман Кена Кізі “Над кукушкиным гнездом”. За гады сваёй творчай дзейнасці мастак праілюстраваў больш за 50 кніг, сярод якіх творы Чукоўскага, Ліндгрэн, Сямёнавай, Грэйвза, Гофмана.
Госці мерапрыемства пазнаёміліся з унікальнымі кнігамі ручной работы і ілюстрацыямі да іх, выкананымі ў тэхніцы афорта, літаграфіі, ксілаграфіі, акварэлі. Серыі “Сем смяротных грахоў”, “Славянскія міфічныя істоты”, “Кітайскія стратагемы” прадстаўлены ў вытанчанай тэхніцы афорта. Узорамі ксілаграфіі з’яўляюцца работы да твораў М.Я. Салтыкова-Шчадрына і да зборніка “Испанские новеллы Золотого века”. У тэхніцы літаграфіі выкананы ілюстрацыі да “Фауста” І. Гётэ і апавяданняў А.П. Чэхава.
У адкрыцці выстаўкі прынялі ўдзел майстар жывапісу і графікі Алег Яхнін, загадчык аддзела галерэйна-выставачнай дзейнасці Нацыянальнай бібліятэкі Беларусі Аляксандр Зіменка, дырэктар фонду “Мастацтва графікі” Кацярына Дружыніна, намеснік старшыні Саюза мастакоў Беларусі па выставачнай дзейнасці мастак Леанід Хобатаў.
Па завяршэнні мерапрыемства Кацярына Дружыніна перадала ў дар Нацыянальнай бібліятэцы кнігі Алега Яхніна.
Выстаўка будзе дэманстравацца ў галерэях "Атрыум", "Лабірынт" (3-ці паверх) да 12 мая 2016 года.
Тэлефон для даведак: (8 017) 293 27 56, 293 28 33.
Е-mail: pr@nlb.by
 |
 |
 |
 |
 |
 |
 |
 |
 |
 |
 |
 |
 |
