Генеральны дырэктар Нацыянальнай бібліятэкі Беларусі Вадзім Гігін узяў удзел ва ўрачыстых мерапрыемствах, прысвечаных 100-годдзю Нацыянальнай бібліятэкі Азербайджана імя М.Ф. Ахундава.
20–21 верасня ў Баку прайшоў шэраг навуковых і культурна-асветніцкіх мерапрыемстваў у гонар стагоддзя найбуйнейшай бібліятэкі Азербайджана. Цэнтральнай падзеяй стала міжнародная навукова-практычная канферэнцыя “Нацыянальныя бібліятэкі – захавальнікі духоўнага багацця народаў”, дзе выступілі кіраўнікі вядучых бібліятэк краін СНД, Італіі, Ватыкана, Турцыі і Катара. У сваім дакладзе Вадзім Гігін абазначыў ролю Нацыянальнай бібліятэкі ў фарміраванні і развіцці дзяржаўнай гістарычнай палітыкі Рэспублікі Беларусь.
Падчас мерапрыемстваў адбыўся XXVII Агульны сход членаў некамерцыйнага партнёрства “Бібліятэчная асамблея Еўразіі”. На пасяджэнні ўдзельнікі абмеркавалі шэраг актуальных для галіны пытанняў, уключаючы прафесійныя мерапрыемствы бібліятэк – удзельніц БАЕ. Вадзім Гігін расказаў калегам аб падрыхтоўцы Х Міжнароднага кангрэса “Бібліятэка як феномен культуры”, які пройдзе 19–20 кастрычніка ў Нацыянальнай бібліятэцы Беларусі.
Матэрыял пададзены аддзелам сувязей з грамадскасцю.