30 кастрычніка ў межах святкавання 400-годдзя першага “Буквара” на філалагічным факультэце Беларускага дзяржаўнага ўніверсітэта прайшла прэзентацыя факсіміле “Буквара” 1618 г.
Удзел у прэзентацыі ўзялі аўтары даследаванняў, якія ўвайшлі ў факсімільнае выданне.
Пра “Буквар” 1618 г. як феномен беларускай і сусветнай культуры распавёў Алесь Суша, кандыдат культуралогіі, намеснік дырэктара Нацыянальнай бібліятэкі Беларусі, які курыраваў працэс факсімільнага ўзнаўлення.
Пра гісторыка-культурныя ўмовы ўзнікнення першага “Буквара” расказаў загадчык кафедры гісторыі Беларусі старажытнага часу і сярэдніх вякоў гістарычнага факультэта БДУ дацэнт Юрый Казакоў. Дацэнт філалагічнага факультэта БДУ Галіна Ціванова прааналізавала мову першага “Буквара” ў кантэксце моўных працэсаў у беларускім грамадстве XVII стагоддзя. Прафесар філалагічнага факультэта БДУ Вольга Праскаловіч прадэманстравала педагагічны патэнцыял “Буквара” 1618 г.
Вынікі сустрэчы падсумаваў загадчык кафедры гісторыі беларускай мовы філалагічнага факультэта БДУ Мікалай Прыгодзіч, які падкрэсліў выключнае значэнне факсімільнага ўзнаўлення першага “Буквара”. Паколькі ў Беларусі арыгінал гэтага выдання не захаваўся, то факсімільнае выданне дазволіць вучоным, выкладчыкам і студэнтам атрымаць доступ да знакавага помніка нацыянальнай культуры.
На мерапрыемстве была выражана ўдзячнасць партнёрам па рэалізацыі дадзенага праекта, у ліку якіх Нацыянальная бібліятэка Беларусі, Бібліятэка Ганаровага таварыства Мідл Тэмпл у Лондане, Пасольства Рэспублікі Беларусь у Злучаным Каралеўстве Вялікабрытаніі і Паўночнай Ірландыі, Міністэрства культуры Рэспублікі Беларусь, Міжнародная асацыяцыя беларусістаў, Беларускі дзяржаўны ўніверсітэт, Міністэрства адукацыі Рэспублікі Беларусь, Еўрапейскі банк рэканструкцыі і развіцця, а таксама Беларускі банк развіцця і рэканструкцыі “Белінвестбанк”.
Чытайце таксама:
- Факсіміле першага беларускага “Буквара” перададзена ў дар Еўрапейскаму банку рэканструкцыі і развіцця
- Прэзентацыя першага ў свеце “Буквара” ў Бібліятэцы Мідл Тэмпл і Школе славянскіх і ўсходнееўрапейскіх даследаванняў
- Першы ў свеце “Буквар” папоўніў фонды Беларускай бібліятэкі і музея імя Францыска Скарыны ў Лондане