23 красавіка ў бібліятэцы пройдуць мерапрыемствы, прысвечаныя Сусветнаму дню кнігі і аўтарскага права, а таксама Міжнароднаму дню інтэлектуальнай уласнасці.
А 10-й гадзіне адбудзецца адукацыйны семінар “Аўтарскае права ва ўмовах лічбавай трансфармацыі” (рэгістрацыя).
У ім возьмуць удзел кіраўнікі і спецыялісты Нацыянальнага цэнтра інтэлектуальнай уласнасці, Беларускага дзяржаўнага ўніверсітэта, супрацоўнікі бібліятэк і іншых інфармацыйных устаноў краіны.
А 16-й гадзіне ў галерэі “Лабірынт” (3-ці паверх) пройдзе культурна-асветніцкая акцыя “Майстры беларускай культуры. Уладзімір Саўчык”, прысвечаная творчасці таленавітага кампазітара. Падчас мерапрыемства адбудзецца перадача правоў на выкарыстанне лічбавых копій рукапісаў нот і кніжных выданняў аўтара ў інфармацыйных рэсурсах Нацыянальнай бібліятэкі Беларусі.
У рамках культурна-асветніцкай акцыі плануюцца выступленні членаў сям’і кампазітара, прадстаўнікоў Беларускай дзяржаўнай філармоніі, Беларускага саюза кампазітараў, Белтэлерадыёкампаніі, Мінскага гарадскога аддзялення Саюза пісьменнікаў Беларусі.
Падчас мерапрыемства адбудзецца прэзентацыя электроннага рэсурсу “Майстры беларускай культуры. Уладзімір Саўчык”, дзе сабраны электронныя копіі рукапісных нот і кніжных выданняў.
Для наведвальнікаў будзе арганізавана выстава-прагляд, якая дазволіць бліжэй пазнаёміцца з жыццём і творчасцю вядомага беларускага таленавітага кампазітара Уладзіміра Саўчыка.
Матэрыял пададзены аддзелам фарміравання электроннай бібліятэкі.
