14 чэрвеня ў бібліятэцы прайшоў паўфінал конкурсу юных чытальнікаў “Жывая класіка”.
З самага ранку ў атрыуме 2-га паверха панаваў тэатральны настрой. Касцюмы, дэкарацыі, фінальны прагон тэксту, хваляванне і яркія эмоцыі...
Сёння тут сабраліся ўдзельнікі абласных і Мінскага гарадскога конкурсаў юных чытачоў “Жывая класіка”. Дзеці ўжо прайшлі першы, другі і трэці этапы конкурсу, перамога для кожнага з іх зусім побач, засталося толькі годна прадэманстраваць сваё мастацтва дэкламацыі ў паўфінале.
Выступленні юных чытальнікаў былі вельмі рознымі: ад прозы да вершаў, ад сумных нот да смеху і запалу. Аднак усе ўдзельнікі праявілі сябе як сапраўдныя акцёры – пераканаўчыя жэсты і міміка, чуллівае прачытанне тэксту, часта нечаканыя, не па-дзіцячы перададзеныя эмоцыі.
Няпросты выбар трэба было зрабіць членам журы, сярод якіх былі вядомыя пісьменнікі, работнікі культуры і мастацтва, грамадскія дзеячы, філолагі і педагогі. Пасля доўгага і бурнага абмеркавання журы вызначыла дванаццаць лепшых юных чытальнікаў.
Пераможцы сённяшняга конкурснага этапу будуць змагацца ў фінале на святочнай сцэне XXV Дня беларускага пісьменства.
Да сустрэчы на свяце беларускага слова ў горадзе Іванава Брэсцкай вобласці!
Арганізатары мерапрыемства – Міністэрства інфармацыі Рэспублікі Беларусь, Міністэрства адукацыі Рэспублікі Беларусь, ЗАТ “Сталічнае тэлебачанне”, Саюз пісьменнікаў Беларусі, Нацыянальная бібліятэка Беларусі.
