Запрашаем наведаць выстаўку “Адзенне нашых продкаў. Графіка XVIII–XIX стагоддзяў”, якая адкрылася 14 чэрвеня ў галерэі “Ракурс” (2-гі паверх).
Нярэдка каштоўнай крыніцай для вывучэння гісторыі і культуры народа станавіліся замалёўкі рускіх і замежных мастакоў. У сваіх работах майстры імкнуліся захаваць тое, што бударажыла ўяўленне, здавалася незвычайным і экзатычным, у тым ліку і традыцыйную вопратку.
У Расіі цікавасць да нацыянальнага мастацтва пачала складвацца толькі ў канцы XVIII стагоддзя, а першыя сур’ёзныя даследаванні па гэтай тэме сталі з’яўляцца з другой чвэрці XIX стагоддзя. Немалую ролю тут адыграла “ахоўная” палітыка імператара Мікалая I. “Па найвышэйшым загадзе” была сабрана, замалявана і апісана вялізная колькасць помнікаў мастацкай культуры і мастацтва, у тым ліку і нацыянальныя касцюмы шматлікіх народаў.
Дзіўная калекцыя гравюр XVIII і літаграфій XIX стагоддзя рускіх і замежных мастакоў па праву з’яўляецца гонарам Расійскай дзяржаўнай бібліятэкі мастацтваў. Яна прадставіла ўвазе гасцей выстаўкі работы, у якіх знайшлі адлюстраванне нацыянальныя касцюмы народаў, што засялялі Расійскую імперыю ў тыя далёкія часы.
Больш даведацца пра гісторыю рускага і беларускага касцюма ўдзельнікі мерапрыемства змаглі падчас знаёмства з кніжнай выстаўкай-праглядам, падрыхтаванай Нацыянальнай бібліятэкай Беларусі.
У вернісажы ўзялі ўдзел першы намеснік дырэктара Нацыянальнай бібліятэкі Беларусі Алена Далгаполава, сакратар Пасольства Расійскай Федэрацыі ў Рэспубліцы Беларусь Марыя Тонец, загадчыца аддзела культурных праграм Расійскай дзяржаўнай бібліятэкі мастацтваў Кацярына Шумянцава, прафесар кафедры гісторыі і тэорыі мастацтваў Беларускай дзяржаўнай акадэміі мастацтваў Яўген Шунейка і загадчыца Дзяржаўнага музея гісторыі тэатральнай і музычнай культуры Рэспублікі Беларусь Зінаіда Кучар.Выстаўка “Адзенне нашых продкаў. Графіка XVIII–XIX стагоддзяў” будзе доўжыцца да 14 ліпеня 2018 года.
Дата завяршэння работы выстаўкі можа быць зменена.
Тэлефон для даведак: (8 017) 266 37 37, 293 28 23.
Е-mail: pr@nlb.by
