24 красавіка 2009 года ў рамках XVI Міжнароднага форума па тэлекамунікацыях, інфармацыйных і банкаўскіх тэхналогій “ТІБО-2009” адбыўся круглы стол “Лічбавы кантэнт”, у якім прыняла ўдзел Нацыянальная бібліятэка Беларусі.
У ходзе мерапрыемства абмяркоўваліся пытанні інфармацыйнага забеспячэння інавацыйнай дзейнасці бібліятэк Беларусі, сучаснага стану рэсурсаў навукова-тэхнічнай інфармацыі, арганізацыі доступу да ведаў ў сферы інавацый і прававых інфармацыйных рэсурсаў, асаблівасцяў фарміравання беларускага сегмента сеткі Інтэрнэт, дзейнасць Нацыянальнай бібліятэкі Беларусі і іншых бібліятэк рэспублікі па фарміраванні і карпаратыўным выкарыстанні электронных інфармацыйных рэсурсаў.
Прамоўцы звярнулі асаблівую ўвагу на неабходнасць распрацоўкі заканадаўчай базы, якая рэгламентуе функцыянаванне і лігітымнасць электронных публікацый; фарміраванне нацыянальных навуковых рэсурсаў адкрытага доступу; неабходнасць правядзення работ па адборы і арганізацыі доступу карыстальніцкай аўдыторыі Беларусі да сусветных навуковых рэсурсаў адкрытага доступу; мэтазгоднасць уключэння ў склад груп па распрацоўцы беларускага сегмента сеткі Інтэрнэт прадстаўнікоў Нацыянальнай бібліятэкі Беларусі і іншых буйных бібліятэк рэспублікі як інфармацыйных устаноў, што працуюць з самай шырокай карыстальніцкай аўдыторыяй і самымі вялікімі аб’ёмамі інфармацыйнай прадукцыі; актуальнасць правядзення арганізацыйных мерапрыемстваў па стварэнні нацыянальных інфармацыйных прадуктаў, якія адлюстроўваюць узровень навуковага цытавання.