15–16 красавіка 2009 года ў Нацыянальнай бібліятэцы Украіны прайшоў семінар па праекце ЮНЕСКА “Стварэнне каталога «Бібліятэка Храптовічаў»”.
У рабоце семінара прынялі ўдзел намеснік дырэктара па навуковай рабоце і сувязях з грамадскасцю Нацыянальнай бібліятэкі Беларусі Л.Г. Кірухіна і загадчык навукова-даследчага аддзела кнігазнаўства Г.У. Кірэева.
На сустрэчы з генеральным дырэктарам Нацыянальнай бібліятэкі Украіны А.С. Анішчанкам быў абмеркаваны Дагавор аб супрацоўніцтве паміж нацыянальнымі бібліятэкамі Беларусі і Украіны і разгледжана Пагадненне аб сумеснай рабоце над праектам “Стварэнне каталога «Бібліятэка Храптовічаў»”. З абодвух бакоў вызначаны каардынатары і ўзгоднены арганізацыйныя пытанні праекта .
Удзельнікамі семінара былі прадстаўлены паведамленні як пра саму калекцыю бібліятэкі Храптовічаў, так і пра яе фізічны стан. Асаблівая ўвага была нададзена пытанню алічбоўкі тытульных аркушаў выданняў, дэталёва абмеркаваны метады апісання і сканіравання дакументаў і інш. Усё гэта дазволіць працягнуць работу па выяўленні кніг, што належалі Храптовічам, не толькі ў Нацыянальнай бібліятэцы Украіны, але і ў іншых бібліятэках.
Нацыянальнай бібліятэцы Беларусі перадалі 2 489 электронных копій тытульных аркушаў кніг са збору Храптовічаў, што захоўваюцца ў фондах Нацыянальнай бібліятэкі Украіны.
Атрымана згода ўкраінскага боку на выкарыстанне паўнатэкставых электронных копій двух важных для даследчыкаў рукапісаў – “Записки Млечко” і Другога Cтатута 1566 г.
