20 лістапада а 15-й гадзіне ў зале адукацыйных тэхналогій (пам. 346) пройдзе пасяджэнне круглага стала “Кніжная культура праваслаўнай царквы ў Беларусі”.
Мерапрыемства арганізавана Нацыянальнай бібліятэкай Беларусі ў рамках Года кнігі пры падтрымцы Культурнага цэнтра Беларусі пры Пасольстве Рэспублікі Беларусь у Рэспубліцы Польшча.
Пад час пасяджэння круглага стала з удзелам беларускіх навукоўцаў ладзіцца прэзентацыя найноўшых, прысвечаных гісторыі праваслаўнай царквы на Беларусі выданняў вядомага беларускага гісторыка з Польшчы, прафесара Беластоцкага ўніверсітэта Антона Мірановіча, а таксама перадача ў дар Нацыянальнай бібліятэцы Беларусі часткі яго архіва.
Антон Мірановіч займаецца даследаваннем беларуска-расійска-польскіх узаемасувязей, гісторыяй праваслаўнай царквы ў Польшчы, Беларусі і Расіі, вывучае культуру беларускай нацыянальнай меншасці ў Польшчы. З’яўляецца членам прэзідыума Міжнароднай акадэміі вывучэння нацыянальных меншасцей, Міжнароднай асацыяцыі беларусістаў, Польска-расійскай гістарычнай камісіі Польскай акадэміі навук, Міжнароднай камісіі гісторыі царквы Польскай акадэміі навук, Усходнеславянскай камісіі Польскай акадэміі навук у Кракаве.
Кніжная культура праваслаўнай царквы ў Беларусі вызначаецца вялікім багаццем і разнастайнасцю. Створаныя на працягу многіх стагоддзяў існавання хрысціянства на нашых землях кніжныя помнікі маюць выключнае значэнне для айчыннай культуры. У сувязі з гэтым першачарговай задачай сучаснасці становіцца выпрацоўка механізмаў выяўлення, апісання, захавання і папулярызацыі гэтага скарбу нашых продкаў.
Тэлефоны для даведак: (8 017) 293 27 22, 293 27 67.
E-mail: pr@nlb.by