Беларускі саюз мастакоў робіць свой унёсак у святкаванне краінай Года кнігі. 14 лістапада ў сталічным Палацы мастацтва адкрылася выстаўка “Фэст кнігі”.
Увесну БСМ зладзіў “Фэст літары”, прысвечаны мастацтву каліграфіі, цяпер жа гаспадыня Палаца – Кніга. У экспазіцыі будзе прадстаўлена ўсё, што мае дачыненне да кнігі як мастацкага аб’екта. Але найперш выстаўка будзе рэтраспектывай беларускай кніжнай графікі за апошнія 50 гадоў – з 1960-х да нашых дзён.
60-я гады ўзяты за кропку адліку, бо менавіта тады пачалося дынамічнае развіццё ўсяго беларускага мастацтва, у тым ліку графікі. Гэты час прадстаўлены імёнамі А. Кашкурэвіча, А. Лось, В. Шаранговіча, Г. Паплаўскага ды іншых. У 1980-я эстафету пераймаюць М. Басалыга, М. Селяшчук, В. Славук, У. Вішнеўскі. Ёсць чым ганарыцца і сёння: П. Татарнікаў, Ю. Якавенка, Ю. Алісевіч…
Усяго ў экспазіцыі – больш як сто ілюстрацый розных перыядаў. На іх прыкладзе дапытлівы глядач здолее пабачыць, як за дзесяцігоддзі змяніліся інструментарый мастакоў і запыты чытаючай публікі, як ясны і просты канон афармлення кнігі масавых накладаў саступіў мудрагелістаму дызайну на базе камп’ютарных праграм. Гэта ўжо не кажучы пра выданні, галоўная функцыя якіх – падарункавая. Тым не менш і раней, і цяпер глядач ды чытач аддае перавагу кнігам, у афармленні якіх адчуваецца не дасканаласць інструмента, але рука майстра. Такіх твораў кніжнага мастацтва на гэтай выстаўцы багата.
Крыніца: газета “Культура”
Чытайце таксама:
Ручныя літары