16 лютага ў віртуальнай чытальнай зале Нацыянальнай бібліятэкі Беларусі прайшоў анлайн-семінар, прысвечаны інфармацыйнаму забеспячэнню сферы інклюзіўнай адукацыі ў Рэспубліцы Беларусь.
Спецыялісты аддзела карпаратыўнага ўзаемадзеяння (Люцыя Тупчыенка-Кадырава, Дар’я Рымша) прэзентавалі ўдзельнікам ліцэнзійныя базы даных, якія змяшчаюць метадычную і вучэбную літаратуру па пытаннях навучання людзей з асаблівымі адукацыйнымі патрэбамі.
Былі раскрыты магчымасці выкарыстання электронных інфармацыйных рэсурсаў пры дыстанцыйнай адукацыі і прадстаўлены спецыяльна распрацаваныя адаптыўныя тэхналогіі для невідушчых і слабавідушчых людзей, аўдыякалекцыі мастацкай і вучэбнай літаратуры.
У мерапрыемстве ўзялі ўдзел прадстаўнікі Інстытута інклюзіўнай адукацыі Беларускага дзяржаўнага педагагічнага ўніверсітэта імя М. Танка, спецыялізаваных школ-інтэрнатаў для дзяцей з парушэннямі зроку і слыху, тэрытарыяльных цэнтраў сацыяльнага абслугоўвання насельніцтва, публічных бібліятэк.
Віртуальная чытальная зала адкрыта для супрацоўніцтва з усімі бібліятэкамі і інфармацыйнымі цэнтрамі нашай краіны па пытаннях падпіскі на ліцэнзійныя базы даных і навучання працы з імі.
Запрашаем да партнёрства!
Матэрыял пададзены аддзелам карпаратыўнага ўзаемадзеяння.