30 кастрычніка ў межах святкавання 400-годдзя першага “Буквара” дырэктар Нацыянальнай бібліятэкі Беларусі Раман Матульскі наведаў Еўрапейскі банк рэканструкцыі і развіцця, дзе сустрэўся з яго прэзідэнтам сэрам Сумам Чакрабарці.
Дырэктар Нацыянальнай бібліятэкі Беларусі правёў прэзентацыю і перадаў у дар факсіміле першага беларускага “Буквара”, выданне якога стала магчымым дзякуючы фінансавай падтрымцы Еўрапейскага банка рэканструкцыі і развіцця. Па словах Рамана Матульскага, такія сумесныя праекты эфектыўна садзейнічаюць пашырэнню і актывізацыі супрацоўніцтва ў галіне культуры з іншымі краінамі, развіццю дружбы і ўзаемаразумення паміж народамі.
Падчас сустрэчы бакі разгледзелі магчымасці далейшага ўзаемадзеяння паміж Нацыянальнай бібліятэкай Беларусі і Еўрапейскім банкам рэканструкцыі і развіцця. Кіраўнікі таксама абмеркавалі дзейнасць па ажыццяўленні праектаў па захаванні, прымнажэнні і папулярызацыі кніжнай спадчыны, абмяняліся думкамі аб перспектыўных напрамках супрацоўніцтва.
Партнёрамі па факсімільным узнаўленні першага ў свеце “Буквара” таксама выступілі Бібліятэка Ганаровага таварыства Мідл Тэмпл у Лондане, Пасольства Рэспублікі Беларусь у Злучаным Каралеўстве Вялікабрытаніі і Паўночнай Ірландыі, Міністэрства культуры Рэспублікі Беларусь, Міжнародная асацыяцыя беларусістаў, Беларускі дзяржаўны ўніверсітэт, Міністэрства адукацыі Рэспублікі Беларусь, Беларускі банк развіцця і рэканструкцыі “Белінвестбанк”.
Візіт адбыўся пры арганізацыйнай падтрымцы Пасольства Рэспублікі Беларусь у Злучаным Каралеўстве Вялікабрытаніі і Паўночнай Ірландыі.
Чытайце таксама:
- Прэзентацыя першага ў свеце “Буквара” ў Бібліятэцы Мідл Тэмпл і Школе славянскіх і ўсходнееўрапейскіх даследаванняў
- Першы ў свеце “Буквар” папоўніў фонды Беларускай бібліятэкі і музея імя Францыска Скарыны ў Лондане
