30 кастрычніка ў Гомельскай абласной універсальнай бібліятэцы імя У.І. Леніна прайшоў міжнародны форум “Дыялог бібліятэк – дыялог культур”, прысвечаны 45-годдзю садружнасці бібліятэк Бранскай, Чарнігаўскай і Гомельскай абласцей.
Форум сабраў кіраўнікоў і вядучых спецыялістаў публічных бібліятэк і ўстаноў культуры Бранскай (Расія) і Гомельскай (Беларусь) абласцей, каб падвесці вынікі шматгадовага супрацоўніцтва і абмеркаваць планы на сумесную будучыню.
Падчас адкрыцця ўдзельнікаў форуму павіталі вядучы рэферэнт галоўнага ўпраўлення ідэалагічнай работы, культуры і па справах моладзі Гомельскага аблвыканкама Таццяна Забіяка і дырэктар Гомельскай абласной універсальнай бібліятэкі імя У.І. Леніна Марына Рафеева.
Дырэктар Нацыянальнай бібліятэкі Беларусі Раман Матульскі выступіў з дакладам “Спадчына Скарыны як духоўны мост паміж славянскімі народамі”, прэзентаваў факсімільнае выданне “Кніжная спадчына Францыска Скарыны” і прыняў удзел ва ўрачыстай цырымоніі перадачы каштоўных тамоў бібліятэкам Гомельскай вобласці.
Выхад у 2017 годзе юбілейнага падарунка ў выглядзе адзінага факсіміле прац беларускага першадрукара стаў магчымым дзякуючы сумесным намаганням Нацыянальнай бібліятэкі Беларусі і Банка БелВЭБ. Кожная з партнёрскіх арганізацый максімальна выкарыстала свой патэнцыял і рэсурсы, каб падчас святкавання 500-годдзя беларускага кнігадрукавання слова і слава Скарыны прагучалі не толькі на яго Радзіме, але і за яе межамі.
На пасяджэнні з дакладамі таксама выступілі дырэктар Гомельскай абласной універсальнай бібліятэкі імя У.І. Леніна Марына Рафеева, дырэктар Бранскай абласной навуковай універсальнай бібліятэкі імя Ф.І. Цютчава Святлана Дзядзюля, кандыдат эканамічных навук Валерый Сяліцкі, загадчык філіяла Веткаўскага музея стараверства і беларускіх традыцый імя Ф.Р. Шклярава Пётр Цалко, вядучы бібліятэкар Славянскай бібліятэкі-філіяла Святлана Дэй-Рачынская, дырэктар Клімаўскай міжпасялковай цэнтральнай бібліятэкі Таццяна Палятаева, загадчык аддзела бібліятэказнаўства Гомельскай абласной універсальнай бібліятэкі Юрый Рачынскі.
Правядзенне падобных мерапрыемстваў дазваляе прафесіяналам бібліятэчнай справы не толькі абмяняцца назапашаным вопытам працы, намеціць шляхі далейшага супрацоўніцтва, але і служыць справе яднання славянскіх народаў, умацаванню духоўных і культурных сувязей.
