30 кастрычніка ў Гомельскай абласной універсальнай бібліятэцы імя У.І. Леніна адбылося ўрачыстае адкрыццё абноўленага аддзела абслугоўвання навучэнцаў 1–5 класаў. У цырымоніі прыняў удзел дырэктар Нацыянальнай бібліятэкі Беларусі Раман Матульскі.
Сёння гэта структурнае падраздзяленне – сучасны інфармацыйна-культурны і адукацыйны цэнтр для дзяцей дашкольнага і малодшага школьнага ўзросту.
У гонар 500-годдзя беларускага кнігадрукавання аддзел не толькі абнавіў свой інтэр’ер. Дзякуючы акцыі “Падары кнігу дзецям!”, арганізаванай Гомельскай абласной бібліятэкай, яго фонд папоўніўся новымі цікавымі выданнямі.
Усяго для дзяцей прадстаўлена звыш 43 тыс. асобнікаў кніг і больш за 60 найменняў перыядычных выданняў.
Клуб выхаднога дня “Чамучка” працуе пры аддзеле ўжо больш за 25 гадоў. Арганізацыя сумеснага вольнага часу юных чытачоў і ўключэнне іх у актыўную літаратурна-творчую дзейнасць дапамагае ўсталяванню сяброўскіх адносін паміж дзецьмі.
У музеі літаратурнага героя Бураціна, які створаны пры дзіцячым аддзеле, захоўваецца больш за 40 розных выданняў – кнігі А. Талстога “Золотой ключик, или Приключения Буратино”, К. Калодзі “Приключения Пиноккио”, творы сучасных аўтараў, якія апавядаюць пра новыя прыгоды Бураціна.
Наведвальнікі “чароўнай краіны Бураціна” могуць не толькі прачытаць казку пра прыгоды драўлянага чалавечка на рускай, беларускай, украінскай, англійскай мовах, але і праслухаць і паглядзець гэтую займальную гісторыю на CD і DVD у выкананні вядомых акцёраў.
Калекцыю кніг дапаўняюць цацкі, прадметы, якія маюць дачыненне да казкі. Экспазіцыю ўпрыгожваюць маляўнічыя пано з мазаікі, выкананыя дзецьмі.
У аддзеле абслугоўвання навучэнцаў 1–5 класаў Гомельскай абласной універсальнай бібліятэкі, які з’яўляецца сапраўдным домам сяброўства для маленькіх чытачоў і іх бацькоў, заўсёды шмат наведвальнікаў.