Зусім хутка стартуе самая доўгачаканая спартыўная падзея года – II Еўрапейскія гульні. Спаборніцтвы заяўлены як мерапрыемства, свабоднае ад курэння: у рамках Еўрагульняў праводзіцца інфармацыйна-адукацыйная акцыя “Беларусь супраць тытуню”.
Нацыянальная бібліятэка Беларусі далучаецца да гэтай ініцыятывы, бо шкодная звычка шкодзіць здароўю, а прафілактыка спажывання тытуню – адна з найважнейшых мер па зніжэнні захворванняў, звязаных з курэннем.
Наведвальнікаў “алмаза ведаў” чакаюць дзве тэматычныя экспазіцыі.
Першая – “Свет без шкодных звычак” размяшчаецца ў зале перыядычных выданняў (пам. 106). Прадстаўленыя на выстаўцы публікацыі ў часопісах “Семейный доктор”, “Воспитание школьников”, “Psychologies”, у газетах “Знамя юности”, “Медицинский вестник” і іншых перыядычных выданнях распавядаюць пра згубны ўплыў курэння, ужывання алкаголю і наркотыкаў, а таксама аб шопагалізме, інтэрнэт-залежнасці, харчовых прыхільнасцях і іншых шкодных звычках.
Другая экспазіцыя – “Скажы «НЕ» шкодным звычкам”. Выстаўку можна ўбачыць у атрыуме 1-га паверха. Тут аб шкодных звычках расказана ў плакатах, цытатах і бібліяграфічных спасылках.
На дадзены момант прагнозы Сусветнай арганізацыі аховы здароўя не суцяшальныя – спажыванне тытуню штогод выносіць каля 7 мільёнаў чалавечых жыццяў, і, калі не будуць прыняты меры, лік штогадовых выпадкаў смерці да 2030 года можа перавысіць 8 мільёнаў.Больш інфармацыі вы зможаце знайсці тут.
Матэрыял прадастаўлены аддзелам сувязей з грамадскасцю.
