13–14 чэрвеня на базе ДУК “Аршанская цэнтралізаваная бібліятэчная сістэма” адбудзецца Рэспубліканская школа дырэктараў бібліятэк.
Абмеркаваць пытанні ў галіне культуры і бібліятэчнай справы ў Оршы збяруцца каля 150 дэлегатаў. Сярод іх прадстаўнікі Міністэрства культуры Рэспублікі Беларусь, Аршанскага раённага выканаўчага камітэта, Нацыянальнай бібліятэкі Беларусі, а таксама дырэктары абласных і цэнтральных бібліятэк рэспублікі.
На пленарным пасяджэнні будуць разгледжаны пытанні заканадаўчага рэгулявання бібліятэчнай дзейнасці, праблемы статыстычнага ўліку работы бібліятэк, а таксама стан і перспектывы развіцця галіны культуры і публічных бібліятэк Аршанскага раёна і Віцебскага рэгіёну ў цэлым.
Падчас сесій дэлегаты абмяркуюць улік і захаванасць кніжных помнікаў краіны і ролю бібліятэк у папулярызацыі кніжнай спадчыны, выкарыстанне віртуальных сэрвісаў для аддаленага абслугоўвання карыстальнікаў, прааналізуюць сайты бібліятэк, ролю прафесіі бібліятэкара ў сучасным свеце, значэнне бесперапыннай адукацыі ў фарміраванні высокакваліфікаванага спецыяліста і удасканаленні кадравай палітыкі ўстановаў культуры.
У рамках мерапрыемства адбудзецца цырымонія перадачы ў дар Аршанскай цэнтралізаванай бібліятэчнай сістэме краязнаўчай літаратуры з усіх рэгіёнаў Рэспублікі Беларусь. Акцыя прымеркавана да Года малой радзімы.
Удзельнікі і госці школы дырэктараў змогуць азнаёміцца з літаратурай з фондаў Нацыянальнай бібліятэкі Беларусі.
Кніжная выстаўка “Бібліясфера. Выданні Нацыянальнай бібліятэкі Беларусі” прадставіць выданні для практычнага прымянення ў арганізацыі бібліятэчна-інфармацыйнай дзейнасці.
Выстаўка “500 гадоў беларускага кнігадрукавання” прадэманструе гісторыю беларускага кнігадрукавання праз кніжныя выданні і выбітныя постаці беларускай культуры, характэрныя для пэўнага часу.
Мерапрыемства пройдзе па адрасе г. Орша, зав. Паштовы, 1 (Дзіцячая школа мастацтваў № 1).
Тэлефон для даведак: (8 017) 293 28 81.
Е-mail: pr@nlb.by
Матэрыял прадастаўлены аддзелам сувязей з грамадскасцю.