16 сакавіка ў галерэі “Панарама” адбылося ўрачыстае адкрыццё выстаўкі работ эксперыментальнай студыі “Чэрпаний папір”.
Эксперыментальная студыя “Чэрпаний папір”, створаная ў 2005 годзе ў г. Львове (Украіна) на базе Цэнтра творчасці дзяцей і юнацтва Галічыны, прадставіла гледачу 40 мастацкіх работ у тэхніцы “чарпанай паперы”.
У экспазіцыі акцэнтуецца ўвага на новым напрамку ў сучасным мастацтве – выкарыстанні паперы як самадастатковага матэрыялу. Унікальнасць тэхнікі заключаецца ў працэсе выкарыстання рознакаляровай вадкай папяровай масы для стварэння мастацкай выявы.
Урачыстае мерапрыемства адкрыў загадчык аддзела галерэйна-выставачнай дзейнасці Нацыянальнай бібліятэкі Беларусі Фёдар Ястраб. На вернісажы выступілі кіраўнік студыі “Чэрпаний папір”, мастак-педагог Віктар Хаджынаў; кандыдат мастацтвазнаўства, дацэнт кафедры тэорыі і гісторыі мастацтва Беларускай дзяржаўнай акадэміі мастацтваў Яўген Шунейка; выхаванцы студыі “Чэрпаний папір”, аўтары прадстаўленых работ Марына Лазарук і Валянціна Беро.
Выстаўка ладзіцца да 14 красавіка ў галерэі “Панарама” (22-гі паверх, закрытая аглядная пляцоўка). Плата за ўваход складае кошт наведвання агляднай пляцоўкі.