З 18 сакавіка па 7 красавіка ў зале беларускай літаратуры (пам. 205) праходзіць кніжная выстаўка “Рыцар балады”, прысвечаная 50-годдзю Віктара Анатолевіча Шніпа, беларускага паэта.
Віктар Анатолевіч Шніп прыйшоў у літаратуру ў канцы 70-х – пачатку 80-х гг. мінулага стагоддзя, хутка заявіў пра сябе як пра творцу з яркай індывідуальнасцю. Яго творчасць адметная шырокім жанравым і тэматычным дыяпазонам. Ён – аўтар грамадзянска-публіцыстычных, філасофскіх, лірычных і пейзажных вершаў. Значнае месца ў творчасці паэта займае балада, якой Віктар Шніп застаецца адданым на працягу ўсёй сваёй дзейнасці. І менавіта балада высвеціла арыгінальнасць творчага мыслення паэта, яго вобразных сродкаў. Выкарыстоўваючы баладную форму, аўтар стварыў вялікую паэтычную галерэю гістарычных асоб Беларусі і сучаснікаў.
Пранікнёная, шчырая і меладычная паэзія В. Шніпа была заўважана беларускімі кампазітарамі (З. Яўтуховічам і інш.). На вершы паэта напісаны дзесяткі песень – "Песня Адраджэння", "Калежанка", "Свацця", "А ў гасцях" і інш. Даследчыкі песеннай лірыкі паэта адзначаюць, што яна паўплывала таксама на класічны беларускі раманс, надаўшы яму еўрапейскую стылістыку і вобразнасць.
Аб адметнасці творчасці В. Шніпа сведчыць увага да яе крытыкаў і даследчыкаў сучаснай беларускай літаратуры, якія прыязна сустракаюць кожнае новае выданне паэта.
На юбілейнай экспазіцыі прадстаўлены зборнікі вершаў і прозы Віктара Анатолевіча Шніпа, сярод якіх: "Гронка святла" (1983), "Пошук радасці" (1987), "Шляхам ветру" (1990), "Чырвоны ліхтар" (2000), "Інквізіцыя" (2002), "Беларускае мора" (2004), "Балада камянёў" (2006), "Страла кахання, любові крыж" (2008), а таксама творы, уключаныя ў калектыўныя зборнікі, і матэрыялы літаратурна-даследчага характару пра творчасць паэта.
Кантактны тэлефон: 293-27-17.
 |
 |
 |
