Мастацкая выстаўка Таісіі Кухчынскай “Вышыты раманс”, прымеркаваная да Дня маці, пачала працаваць 12 кастрычніка ў галерэі “Панарама” (22-гі паверх).
Экспазіцыя зладжана сумесна з клубам “Прырода і фантазія”, членам якога з’яўляецца мастачка. Клуб існуе з 1968 года і спачатку функцыянаваў як секцыя “Прырода і творчасць” пры сталічным “Доме прыроды” і Беларускім таварыстве аховы прыроды. 40 гадоў членам клуба была народная артыстка БССР Стэфанія Станюта. У 2023 годзе клубу аматараў і творцаў споўнілася 55 гадоў.
Таісія Кухчынская займаецца дэкаратыўным мастацтвам больш за 60 гадоў, яе работы ўдзельнічалі ў сумесных выстаўках клуба, адбылося некалькі персанальных выставак у бібліятэках горада. У 2019-м творы мастачкі экспанаваліся на фестывалі “Славянскі базар” і атрымалі 2-е месца ў намінацыі “Вышыўка стужкай”.
Экспазіцыя “Вышыты раманс” прадстаўляе работы, выкананыя ў тэхніках алмазнай мазаікі, вышыўкі стужкамі, крыжыкам і бісерам, а таксама ў змешаных тэхніках.
Важна, што гісторыя вышыўкі шаўковымі стужкамі, бісерам, дэкаратыўнай мазаікай і ніткамі сыходзіць у глыб вякоў, захоўваючы ў кожным шыўку спрадвечную мудрасць і назапашаныя стагоддзямі веды. Карані найстаражытнейшых відаў рамесніцтва можна адшукаць ва ўсіх краінах свету. Вышываннем спрадвеку захапляліся і майстрыхі на Русі, і рамесніцы на Усходзе, і мастакі-індзейцы ў Паўночнай Амерыцы. Сёння рукадзельнае мастацтва натхнёна і плённа развіваецца і ў Беларусі.
“Вышыты раманс” – гэта пейзажы, нацюрморты, партрэты, архітэктурныя і кветкавыя кампазіцыі. Чароўны свет ствараецца на кавалачках тканіны з дапамогай маленькай іголкі і рознакаляровых нітачак, ззяючых кропляў бісерынак і стужак. Лірычныя, рамантычныя сюжэты ўзнікаюць пад рукамі аўтаркі ў разнастайнасці колераў і адценняў. Надзвычайная дэталёвасць дае магчымасць не толькі перадаць багатую каляровую гаму, але і стварае адчуванне, што перад гледачом не вышыўка, а карціна, напісаная алеем. Дэкаратыўныя работы напоўнены ўтульнасцю і цяплом вобразаў.
З кожным годам, з жыццёвым вопытам расце майстэрства мастачкі, не знікае яе жаданне несці радасць людзям, упрыгожваць жыццё жывапіснай вышыўкай, дзе кожны шывок матэрыялам зроблены ад сэрца і дзеля таго, каб зрабіць свет больш добрым і шчаслівым.
Вясновая раніца, летняе мора, лясны пейзаж, лунаючыя ў летнім марыве жаночыя сілуэты, абрысы начнога горада, багацце кветак – усе створаныя з матчынай руплівасцю, цярплівасцю, дабрынёй работы ладзяць святочную прастору выстаўкі “Вышыты раманс” і становяцца своеасаблівым падарункам і падзякай мамам – наведвальніцам галерэі.
Выстаўка будзе працаваць да 14 студзеня 2024 года.
Дата яе заканчэння можа быць зменена.
Наведванне экспазіцыі ўваходзіць у кошт наведвання агляднай пляцоўкі.
Час работы выстаўкі адпавядае рэжыму работы агляднай пляцоўкі.
Тэлефон для даведак: (8 017) 368 37 37.
Матэрыял пададзены аддзелам галерэйна-выставачнай дзейнасці.