20 мая а 17-й гадзіне ў галерэі “Панарама” Нацыянальнай бібліятэкі Беларусі адбудзецца ўрачыстае адкрыццё выстаўкі жывапісу і камп’ютарнай графікі “Васілёк у новым фармаце”, прысвечанай Дню аховы дзяцей.
Мерапрыемства з’яўляецца сумесным праектам Нацыянальнай бібліятэкі Беларусі, упраўлення адукацыі Мінскага аблвыканкама і Мінскай абласной дзяржаўнай спецыяльнай агульнаадукацыйнай школы-інтэрната для дзяцей з парушэннем слыху п. Ждановічы.
Выстаўка, на якой свае работы прадставяць удзельнікі выяўленчай студыі “Васілёк” Мінскай абласной дзяржаўнай спецыяльнай агульнаадукацыйнай школы-інтэрната для дзяцей з парушэннем слыху, адкрываецца ў рамках праекта “Жывапіс і арт-тэхналогіі ў малюнках дзяцей-інвалідаў”.
Студыя “Васілёк” дзейнічае ў школе-інтэрнаце больш за 15 гадоў. Заняткі мастацтвам даюць унікальную магчымасць для развіцця эстэтычнай культуры дзяцей-інвалідаў, для іх сацыяльнай адаптацыі і псіхалагічнай рэабілітацыі. Глухія дзеці валодаюць больш тонкім зрокавым успрыняццем, таму іх уяўленне іншае, нестандартнае, свет малюецца ў яркіх фарбах і тонкіх адценнях.
На выстаўцы “Васілёк у новым фармаце” юныя мастакі прадэманструюць работы ў тэхніцы жывапісу, акварэлі, камп’ютарнай графікі. На мерапрыемстве выступяць навучэнцы школы-інтэрната з песнямі ў жэставым выкананні і народны тэатр пантамімы “Рух”.
Выстаўка будзе доўжыцца да 3 чэрвеня ў галерэі “Панарама” (22-гі паверх, закрытая аглядная пляцоўка). Плата за ўваход складае кошт наведвання агляднай пляцоўкі. У дзень адкрыцця выстаўкі ўваход бясплатны.
