10 лютага ў бібліятэцы пачала працу выстаўка “Скрозь стагоддзі”, прысвечаная 500-годдзю “Малой падарожнай кніжкі” – першай кнігі, выдадзенай на беларускіх землях.
Выстаўка арганізавана Нацыянальнай бібліятэкай Беларусі сумесна з Беларускай дзяржаўнай акадэміяй мастацтваў. У экспазіцыі прадстаўлены работы студэнтаў, магістрантаў і выкладчыкаў, выкананыя ў тэхніцы высокага друку і камп’ютарнай графікі.
Большасць работ – рэканструкцыі першага тытула “Малой падарожнай кніжкі”, які не захаваўся да нашага часу, але ўзнаўляецца праз ўжыванне своеасаблівага шрыфту і кампазіцыі выдання XVI ст., астатнія работы – вынік эксперыментаў па стварэнні новых шрыфтавых напісанняў па ўзоры старонак “Малой падарожнай кніжкі”. Сучасныя тэхналогіі, магчымасці камп’ютарнай графікі і лічбавага друку далі мастакам шырокі прастор для самавыяўлення. Уражвае разнастайнасць варыянтаў напісання і стварэння шрыфтавых кампазіцый.
Графічныя і вобразныя эксперыменты гістарычных форм шрыфтоў пры захаванні характэрных асаблівасцей “Малой падарожнай кніжкі”, стылістыкі часу, скарынаўскай эстэтыкі, дэкаратыўных уласцівасцей і вынаходак друкара – даніна павагі юбілею беларускага кнігадрукавання і значны ўнёсак у развіццё шрыфтавай культуры Беларусі.
Экспазіцыю дапоўнілі выданні, прысвечаныя дзейнасці беларускага першадрукара, даследаванні і факсіміле ўнікальнага зборніка для падарожнікаў, а таксама паштоўкі з серыі “Мастацкая Скарыніяна” з фонду бібліятэкі.
У адкрыцці выстаўкі прынялі ўдзел намеснік генеральнага дырэктара Нацыянальнай бібліятэкі Беларусі Аляксандр Суша, прарэктар Беларускай дзяржаўнай акадэміі мастацтваў Андрэй Васілеўскі і дэкан факультэта дызайну і дэкаратыўна-прыкладнога мастацтва Беларускай дзяржаўнай акадэміі мастацтваў, член Беларускага саюза мастакоў Усевалад Свентахоўскі.
Знакавая падзея ў культурным жыцці краіны скрозь стагоддзі натхняе сучаснае беларускае кнігадрукаванне і мастацтва на творчы водгук, энтузіязм, развіццё і росквіт.
Запрашаем усіх зацікаўленых наведаць выстаўку!
На адкрыццё ўваход вольны, у астатні час – па чытацкім білеце або білеце сацыякультурнага цэнтра.
Час работы выстаўкі адпавядае рэжыму работы бібліятэкі.
Выстаўка будзе доўжыцца да 12 красавіка 2022 г.
Дата яе заканчэння можа быць зменена.
Тэлефон для даведак: (8 017) 368 37 37.
