Сам сабе мастак

12 верасня ў галерэі “Ракурс” адкрылася II Рэспубліканская выстаўка мастацкай творчасці бібліятэкараў “Сам сабе мастак”.

Гэта сумесны праект Беларускай бібліятэчнай асацыяцыі і Нацыянальнай бібліятэкі Беларусі, традыцыйна падрыхтаваны да Дня бібліятэк.

У экспазіцыі размясцілася больш за 100 работ, выкананых таленавітымі і крэатыўнымі бібліятэкарамі краіны ў розных тэхніках: жывапіс, габелен, бацік, фота, фотакалаж, вышыўка, мазаіка, фларыстыка, малюнак, абрэзкавае шыццё, лялькі ручной работы і інш. Нягледзячы на тое, што найбольшую актыўнасць праявілі супрацоўнікі Нацыянальнай бібліятэкі, экспанаты прывезены з розных куткоў Беларусі: Магілёва, Гродна, Узды, Мастоў, Вілейкі, Старых Дарог і інш.

Разнастайнасць работ, прадстаўленых на выстаўцы, па словах першага намесніка дырэктара Нацыянальнай бібліятэкі Беларусі Алены Далгаполавай, абвяргае агульнапрынятыя ўяўленні пра бібліятэкараў, як пра нудных людзей.

На ўрачыстым адкрыцці выстаўкі ў галерэі сабралася каля двухсот чалавек, сярод якіх – прадстаўнікі гарадской адміністрацыі, супрацоўнікі бібліятэк краіны, непасрэдныя аўтары экспанатаў і іншыя госці.

Немалую частку тых, хто знаходзіўся ў зале, склалі маладыя спецыялісты. З пажаданнем добрага прафесійнага шляху да іх звярнуўся дэкан факультэта інфармацыйна-дакументных камунікацый Беларускага дзяржаўнага ўніверсітэта культуры і мастацтваў Мікалай Яцэвіч. З віншаваннямі да Дня бібліятэк выступілі супрацоўнікі Мінскага гарадскога выканаўчага камітэта і Беларускай сельскагаспадарчай бібліятэкі Нацыянальнай акадэміі навук.

Меладычнымі аўтарскімі песнямі парадавалі залу кандыдат педагагічных навук з Беларускага нацыянальнага тэхнічнага ўніверсітэта Ірына Стралкова і магістр педагагічных навук Павел Макееў. Больш за іншыя бібліятэчнай грамадскасці спадабалася балада пра бібліятэкараў, напісаная выканаўцамі спецыяльна да ўрачыстасці.

Аўтараў лепшых работ выстаўкі “Сам сабе мастак” узнагародзілі дыпломамі і ўручылі ім памятныя падарункі. У намінацыі “Арыгінальнасць тэхнічнага выканання” ўзнагароджаны інжынер Нацыянальнай бібліятэкі Барыс Палянскі за серыю работ у тэхніцы “мазаіка з будаўнічай пліткі” і супрацоўніца Вілейскай цэнтральнай раённай бібліятэкі Анастасія Клімкова за серыю работ у тэхніцы “малюнак ніткай”.

У намінацыі “Адпаведнасць канцэпцыі выстаўкі” перамагла супрацоўніца Мастоўскай цэнтральнай раённай бібліятэкі Галіна Васілеўская з дызайнерскай работай “Адкрытая кніга”, у намінацыі “Высокае майстэрства выканання” – аўтар модульнага арыгамі Галіна Петрушэня са Старадарожскай раённай дзіцячай бібліятэкі.

Дыпломы і падарункі ў намінацыі “Высокая мастацкая якасць” атрымалі прадстаўніца Нацыянальнай бібліятэкі Надзея Рэшатава за серыю работ, выкананых у тэхніцы “габелен”, супрацоўніца Фундаментальнай бібліятэкі БДУ Алена Атрашкевіч за вышыўку “Жыровіцкая Божая Маці”, а таксама Марына Ярэмчык з бібліятэкі Гродзенскага дзяржаўнага медыцынскага ўніверсітэта за аплікацыю з саломкі.

Усе гэтыя і многія іншыя работы, выкананыя таленавітымі супрацоўнікамі беларускіх бібліятэк, можна ўбачыць у галерэі “Ракурс” да 20 кастрычніка 2013 г.