З 17 чэрвеня па 12 верасня ў Нацыянальнай бібліятэцы Беларусі (2-гі паверх, кальцавы калідор) адкрыта выстаўка “Збіральнікі прыгожага: цікавыя захапленні калекцыянераў”.
У кожным чалавеку жыве заўзятасць да збіральніцтва. Часам гэтая заўзятасць захоплівае чалавека цалкам, становіцца яго другой прафесіяй. І тады з простага калекцыяніравання вырастаюць такія з’явы, як Траццякоўская мастацкая галерэя ў Маскве або Музей гісторыі медыцыны ў Рызе, створаны на аснове калекцыі прафесара Страдыня. Адны збіраюць маркі, другія – аўтографы, значкі, трэція – карціны, афішы, паштоўкі, чацвёртыя – прыказкі, афарызмы і г. д. Немагчыма пералічыць усё, што калекцыяніруюць людзі. Збіральніцтвам займаюцца тысячы людзей рознага ўзросту і самых розных прафесій.
Збіральніцтва вядома з найстаражытнейшых часоў. Лічыцца, што паняцце “калекцыяніраванне” было ўведзена ва ўжытак больш за 2 000 гадоў назад Цыцэронам. Знакаміты аратар у сваёй прамове “Аб прызначэнні Гнея Пампея палкаводцам” словам “калекцыя” назваў збіранне разрозненых прадметаў у адно цэлае. Першымі калекцыянерамі гісторыкі лічаць кіраўнікоў Пергамскага царства ў III ст. да н.э.
Асаблівае развіццё калекцыяніраванне атрымала ў эпоху Адраджэння. Так, у зборы сям’і Медычы ў Фларэнцыі нараўне з творамі мастацтва меліся разнастайныя ўнікальныя прадметы і мінералы з многіх краін. Збіральнікамі рэдкасцяў былі Людовік XIV, французскія кардыналы Рышэлье і Мазарыні, папы Юлій II і Леў X, імператар Карл V і інш. Нярэдка формай калекцыяніравання было стварэнне так званых кабінетаў “курыёзных” рэчаў. У Расіі пачатку XVIII ст. зборам такога кшталту была Пятроўская кунсткамера.
Заўзятымі калекцыянерамі былі многія пісьменнікі. У Гётэ была буйнейшая калекцыя мінералаў, а Вальтар Скот збіраў халодную зброю розных краін і народаў. І.С. Тургенеў – заядлы шахматыст – пакінуў пасля сябе ў калекцыі 14 камплектаў шахмат. М.А. Някрасаў сабраў 64 віды паляўнічых стрэльбаў. А.С. Пушкін незадоўга да смерці захапіўся збіраннем газет. Гарачым збіральнікам курыльных люлек быў Ілья Эрэнбург, а Міхаіл Булгакаў – квіткоў ад усіх спектакляў, якія ён наведаў. Жуль Верн меў мноства карт і даведнікаў. Жорж Сіменон збіраў тэлефонныя кнігі і чэрпаў адтуль прозвішчы для сваіх герояў. Касманаўт Юрый Гагарын адным з першых у краіне стаў калекцыяніраваць кактусы.
На тэматычнай кніжнай выстаўцы прадстаўлена каля 300 выданняў. Асобныя раздзелы прысвечаны філатэліі, філуменіі, фалерыстыцы, нумізматыцы, геральдыцы і інш.