З 19 па 30 красавіка ў зале беларускай літаратуры (пам. 205) праходзіць выстаўка “Захавальнік традыцый”, прысвечаная 70-годдзю Уладзіміра Іосіфавіча Мархеля, беларускага літаратуразнаўца, перакладчыка, даследчыка.
Уладзімір Іосіфавіч займаецца вывучэннем беларускай літаратуры XIX ст., беларуска-польскіх літаратурных узаемасувязей, даследуе творчасць Уладзіслава Сыракомлі, Янкі Лучыны, ранні перыяд творчасці Янкі Купалы, калі пісьменнік пісаў па-польску.
Выстаўка складаецца з двух раздзелаў: “Прафесіяналізм, шматграннасць” і “Талент вяртаць з забыцця”.
У першым раздзеле прадстаўлены кнігі Уладзіміра Іосіфавіча Мархеля, а таксама навуковыя зборнікі, у якіх надрукаваны артыкулы і даклады таленавітага вучонага. Сярод выданняў, якія экспануюцца, – аўтарэферат дысертацыі на атрыманне вучонай ступені кандыдата філалагічных навук “Владислав Сырокомля в белорусско-польском литературном взаимодействии (середина XIX – начало ХХ в.)” (1982), кнігі “Лірнік вясковы: Сыракомля ў беларуска-польскім літаратурным узаемадзеянні” (1983), “Крыніцы памяці: старонкі беларуска-польскага літаратурнага сумежжа” (1990), “Прысутнасць былога: нарысы, артыкулы, эсэ” (1997), “Шлях да Беларусі: А. Міцкевіч – прадвеснік адраджэння беларускай літаратуры ” (2003), “Творчасць Уладзіслава Сыракомлі” (2005), “Але…: выбраная лірыка” (2007) і інш.
Другі раздзел змяшчае літаратуру пра творчасць У. І. Мархеля.
Усяго на выстаўцы прадстаўлена каля 90 выданняў.
Кантактны тэлефон: 293-27-16.
 |
 |
 |
 |
