З 9 па 26 лістапада ў зале беларускай літаратуры праходзіць выстаўка «З рамантычнай узнёсласцю», прысвечаная 70-годдзю з дня нараджэння беларускага паэта, празаіка, публіцыста і перакладчыка Валянціна Антонавіча Лукшы.
Выстаўка складаецца з 4-х раздзелаў, у якіх экспануецца звыш 70 дакументаў. У першым раздзеле «Бацькоўскіх крыніц перазовы» прадстаўлены творы аўтара ад першай паэтычнай кнігі «Гарады нараджаюцца сёння» (1964 г.) да выданняў апошніх гадоў, у ліку якіх «І родны дом, іцэлы свет» (2006 г.) серыі «Беларуская паэзія XX стагоддзя». У экспазіцыі каля 20-ці кніг аўтара, напісаных для дзяцей. Сярод зборнікаў, дзе друкаваліся творы паэта, асобным блокам стаяць кнігі серыі “Дзень паэзіі”. Пачынаючы з 1965 па 1984 гг. лепшыя творы паэта былі надрукаваны ў гэтых зборніках.
Валянцін Лукша з’яўляеццааўтарам лібрэта “Барвовы золак” паводле “Палескай хронікі” І. Мележа (паст.1979 г.) і інсцэніроўкі “Асоль” па творах А. Грына (паст. 1985 г.). Да меладычнай паэзіі В. Лукшы звярталіся нашы славутыя кампазітары: Д. Лукас, І. Лучанок, У. Мулявін, Э. Наско і інш.
Творы паэта перакладзены на рускую, украінскую, балгарскую, эстонскую мовы. З гэтымі выданнямі знаёміць другі раздзел экспазіцыі.
Акрамя літаратурнай дзейнасці пісьменнік займаўся перакладамі. У раздзеле «В.А. Лукша – перакладчык» змешчаны творы ў перакладзе паэта з латышскай, таджыкскай, чувашскай, украінскай, грузінскай моў. Ён пераклаў вершы Л.Гарлача, М. Нагнібеды, М. Кемпэ, Н. Думбадзе і інш.
У апошнім раздзеле экспазіцыі «Волат прыдзвінскага краю» змешчаны матэрыялы аб творчым і жыццёвым шляху пісьменніка.
Кантактны тэлефон 293-27-16
