З 1 кастрычніка па 16 лістапада ў зале нотных і аўдыявізуальных дакументаў (пам. 305) праходзіць выстава “Веліч музыкі”, прысвечаная 90-годдзю Сафіі Асгатаўны Губайдулінай.
Сафія Губайдуліна – кампазітар сусветнай вядомасці, класік сучаснай музыкі. Яе творчасць выключна самабытная і не належыць новым музычным плыням і кірункам ХХ стагоддзя. Гэта велічэзны пласт сінтэзу ўсходняй і еўрапейскай культур, як у галіне філасофскага светасузірання, суадносін логікі і інтуіцыі, так і ў плане пошуку тэмбравых і гукавышынных спалучэнняў. Невыпадковая цікавасць Губайдулінай да інструментаў розных эпох і народаў, найбагацейшай калекцыяй якіх яна валодае і якія захоўваюць у сабе тысячагадовыя таямніцы гуку.
Асноўная сфера яе творчых інтарэсаў – камерная музыка розных жанраў: сачыненні для клавесіна і ўдарных, для аргана; ансамблі для духавых інструментаў, п’есы для арфы і кантрабаса, флейты і альта. Кампазітар зрабіла наватарскія адкрыцці ў гучанні баяна, пераўтворанага ў ХХ стагоддзі з народнага інструмента ў акадэмічны.
Сафія Асгатаўна Губайдуліна – аўтар дзясяткаў буйных сімфанічных, вакальна-харавых і камерных твораў, аўтар музыкі да кіно і мультфільмаў (“Вертыкаль”, “Чучала”, “Маўглі” і інш.).
На выставе прадстаўлены ноты канцэрта “Offertorium” для скрыпкі з аркестрам, п’есы для камернага ансамбля, сачыненне для аргана “Светлое и тёмное”, вакальны цыкл “Фацелия”, цыкл дзіцячых п’ес “Музыкальные игрушкиі”, санаты для баяна, п’есы для фартэпіяна, флейты і аргана, а таксама аўдыядакументы: партыта “Семь слов” для віяланчэлі, баяна і струннага аркестра, “Чакона” для фартэпіяна, саната “Et exspecto... (В ожидании...)” для баяна ў выкананні Ф. Ліпса, канцэрт для фагота і нізкіх струнных і інш.
Дадаткова экспануюцца кнігі і артыкулы пра творчасць юбіляра.
Час работы выставы адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 293 27 52.
Матэрыял пададзены аддзелам абслугоўвання спецыялізаванымі фондамі.
