З 10 ліпеня па 2 верасня ў зале беларускай літаратуры (пам. 205) праходзіць юбілейная выстаўка “Вандроўкі па ваколіцах мінулага”, прысвечаная 80-годдзю Льва Раманавіча Казлова.
Гісторык, прафесар Леў Казлоў многія гады працаваў выкладчыкам у Беларускім дзяржаўным універсітэце, Беларускім педагагічным універсітэце імя М. Танка, Беларускім дзяржаўным універсітэце культуры і мастацтваў. Зачараванасць яшчэ са школьных гадоў справамі легендарных першапраходцаў, дзякуючы якім з’яўляліся карты, заняло вядучае месца ў творчым жыцці Льва Раманавіча. Сярод яго навуковых інтарэсаў – гістарычная геаграфія і картаграфія Беларусі. Працуе ён і над старажытнымі картамі. Калегі ахрысцілі яго беларускім Меркатарам. Л. Казлоў упэўнены, што карты могуць расказаць нават больш, чым летапісы, гістарычныя дакументы і мемуары.
Л. Казлоў – член Саюза прадпрымальнікаў Беларусі, Амерыканскай асацыяцыі географаў, міжнароднага “Клуба лідараў гандлю”. Праца яго выдавецтва “Арты-Фэкс” адзначана залатой узнагародай Europe Award (Парыж, 2001).
Экспазіцыя знаёміць з асноўнымі працамі Льва Раманавіча, сярод якіх “Беларусь на сямi рубяжах (XI – пач. XX ст.)”, навукова-папулярны альбом “Старажытная картаграфія Беларусі” ў 3-х выпусках, “Беларусь у працах польскіх картографаў”, “Палессе на старажытных картах” і іншыя. Акрамя гэтага прадстаўлены “Вялікі гістарычны атлас Беларусі” ў 3-х тамах, які выйшаў пры ўдзеле Льва Раманавіча.
Зацікавяць наведвальнікаў і такія літаратурныя выданні Л.Р. Казлова, як кніга гістарычных анекдотаў “З дазволу караля і вялікага князя”, зборнік анекдотаў усіх часоў і народаў “Большой музей остроумия”, гістарычная трылогія “Радзивилл «Сиротка»” (кн. 1), а таксама выдадзены пад псеўданімам Плат Гудовіч зборнік вершаў “Размова нанова”.
Экспазіцыя аздоблена фотаздымкамі, ілюстрацыйным матэрыялам і налічвае больш за 50 дакументаў.Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра бібліятэкі. Тэлефон для даведак: (8 017) 293 27 16.
