З 11 чэрвеня па 20 жніўня ў Нацыянальнай бібліятэцы Беларусі (2-гі паверх, кальцавы калідор) працуе тэматычная выстаўка “У свеце беларускай фантастыкі”, арганізаваная ў межах рэспубліканскай акцыі “Лета з добрай кнігай”.
Жанр фантастыкі валодае асаблівай здольнасцю прымусіць чытача думаць і адчуваць. Глыбіня і шырыня думкі, абвостраная эмацыянальнасць – уласцівасці фантастыкі, якія прыцягвалі найбуйнейшых пісьменнікаў на працягу ўсёй гісторыі літаратуры.
Экспазіцыя, прапанаваная Нацыянальнай бібліятэкай Беларусі, змяшчае каля 200 дакументаў, сярод якіх даведачныя і энцыклапедычныя, літаратурна-мастацкія выданні, зборнікі твораў беларускіх пісьменнікаў з фантастычнымі апавяданнямі, аповесцямі, раманамі і казкамі.
Выстаўка складаецца з трох раздзелаў. У першым – “З гісторыі фантастыкі” – прадстаўлены кнігі, якія распавядаюць пра развіццё фантастычнага жанру за апошнія сто гадоў. У раздзел увайшлі энцыклапедычныя выданні: “Фантастика века” (1995), “Энциклопедия фантастики” (1995); манаграфіі Р.С. Каца “История советской фантастики” (2004), В.В. Шумко “Фантастический жанр в литературе XX–XXI веков: становление и развитие” (2006), Т. Шамякінай “Парадоксы времени, или Романтика советской науки” (2015) і інш.
Раздзел “Ля вытокаў беларускай фантастыкі” змяшчае выданні з фантастычнымі творамі і творамі з элементамі фантастыкі беларускіх пісьменнікаў XIX–XX стагоддзяў: аповесці Я. Маўра “Чалавек ідзе”, “Фантамабіль прафесара Цылякоўскага”; зборнік Я. Баршчэўскага “Шляхціц Завальня, або Беларусь у фантастычных апавяданнях” розных гадоў выдання.
У раздзел “Сучасная беларуская фантастыка” увайшлі фантастычныя раманы, аповесці, апавяданні і казкі сучасных беларускіх пісьменнікаў: А. Казлова, В. Маслюкова, Ю. Брайдэра і М. Чадовіча, С. Данілава, В. Гаўрылава, М. Чаргінца, Р. Баравіковай, Л. Рублеўскай, Н. Новаш і інш. Творы, якія прадстаўлены ў раздзеле, напісаны ў розных фантастычных жанрах: навуковай фантастыкі, фэнтэзі, магічнага рэалізму, жахаў.
Выстаўка будзе цікавай для шырокага кола чытачоў і наведвальнікаў бібліятэкі, дапаможа выбраць захапляльныя кнігі для чытання ў час летняга адпачынку.
Кантактны тэлефон: (8 017) 293 28 86.