З 10 чэрвеня па 28 ліпеня ў зале дакументаў па мастацтве (пам. 306) праходзіць кніжна-ілюстрацыйная выстаўка "З верай і надзеяй", прысвечаная 85-годдзю з дня нараджэння рускага жывапісца і графіка Ільі Сяргеевіча Глазунова.
Імя І. Глазунова сёння вядома ўсяму свету. Выдатным мастаком створана некалькі тысяч твораў, сярод якіх манументальныя гістарычныя палотны і малюнкі герояў Старажытнай Русі, партрэты сучаснікаў, ілюстрацыі да рускай класічнай літаратуры, тэатральныя дэкарацыі і эскізы інтэр'ераў.
Больш за паўстагоддзя І. Глазуноў з'яўляецца ўладаром дум сучаснікаў. Многія спрабуюць растлумачыць феномен мастака, а яго творчасць па-ранейшаму застаецца загадкай. Мастацтва І. Глазунова – заўсёды і выклік, і заклік. Выклік здрадзе, здзеку над святынямі, разбурэнню духоўных асноў, антыкультуры. Заклік да барацьбы за адраджэнне і стварэнне краіны.
Гуманізм, філасофская напоўненасць, псіхалагічная глыбіня, прыгажосць яго вобразаў не могуць нікога пакінуць абыякавым. Ён, як казаў так любімы ім М. Урубель, "абуджае сучаснікаў велічнымі вобразамі духу".
На выстаўцы экспануюцца альбомы з рэпрадукцыямі работ І. Глазунова, якія прадстаўляюць асноўныя цыклы яго творчасці – гістарычныя сюжэты, ілюстрацыі да рускай класічнай літаратуры, партрэты. Асаблівую ўвагу выклікае альбом І. Грабара "Ілья Глазуноў" (2000), выдадзены да 70-годдзя мастака, у якім найбольш шырока адлюстроўваецца шматграннасць творчасці майстра.
Дапаўняюць экспазіцыю даведачная літаратура і публікацыі пра творчасць мастака. Сярод дакументаў – кніга В. Новікава "Илья Глазунов. Русский гений" (2005).
Усяго на выстаўцы прадстаўлена больш за 30 дакументаў.
Кантактны тэлефон: (8 017) 293 27 53.
 |
 |
 |
 |
 |
 |
 |
 |
 |
