З 7 мая па 6 чэрвеня ў зале беларускай літаратуры (пам. 205) праходзіць выстаўка “Споведзь сэрца”, прысвечаная 100-годдзю з дня нараджэння беларускага паэта, празаіка, перакладчыка Антона Пятровіча Бялевіча (1914–1978).
Паэзія пісьменніка пачыналася з мілай сэрцу Дуброўкі, вёскі, дзе адлюстраваўся велічны вобраз бацькаўшчыны, партрэт якой аўтар маляваў усё свае жыццё. Задуменны шум жывога бору, ціхі і ласкавы шэпт спелых каласоў, рознагалосы птушыны гоман, задушэўная народная песня і дзявочы смех зліліся то ў крыху іранічны, то ўсмешлівы, то добразычлівы голас паэта, перапоўнены пачуццём зямной любові да людзей, працы, жыцця.
Выстаўку адкрывае раздзел “Мой кут салаўіны”, які прадстаўляе творы пісьменніка: кнігі паэзіі за розныя гады, зборнік фельетонаў “Маштабны Міканор” (1963), аповесці, кнігі нарысаў “Людзі робяць вясну” (1959), “Сонечным шляхам” (1950) і інш.
Сярод экспанатаў – першая паэма А. Бялевіча “Мой майстра”, напісаная ў гады Вялікай Айчыннай вайны ў партызанскім лагеры бацькі Міная. Яна прынесла аўтару заслужанае прызнанне. Пісьменнік адзначаў: “Творам, з якога пачынаецца мая сапраўдная, больш плённая і больш значная літаратурная работа, лічу паэму “Мой майстра”.
Барацьбе савецкага народа супраць нямецка-фашысцкіх захопнікаў аўтар прысвяціў дакументальныя нарысы “Мінай Шмыроў” (1970), “Хатынь: боль і гнеў” (1971), паэму “Сям’я” (1946). Аднаўленне пасляваеннай беларускай вёскі, працоўны гераізм народа адлюстраваны ў зборніках паэзіі “На бацькоўскіх сцежках” (1946), “Дарогай шчасця” (1952) і інш. У паэме “Карэнні дуба” (1959) малюецца гістарычнае мінулае беларускага сялянства. Традыцыйна-фальклорная вобразнасць, народна-песенны лад з’яўляюцца адметнай рысай зборнікаў “За салаўінымі гаямі” (1959), “А ў бары, бары” (1974), “Любоў мая” (1971) і інш.
Пяру А. Бялевіча належаць кнігі вершаў і паэм для дзяцей “Ідзі, мой сын” (1953), “Тарасікава дарожка” (1962), аповесць “Малюнкі маленства” (1977) і інш.
Другая частка выстаўкі ўключае ўзоры перакладаў як самога А. Бялевіча, так і яго твораў на мовы блізкага і дальняга замежжа. Дзякуючы паэту на беларускай мове гучаць паэмы А. Твардоўскага “За даллю – даль”, “Свіцязь” А. Міцкевіча, “Дэман” М. Лермантава (сумесна з Я. Коласам), асобныя вершы А. Пракоф’ева, М. Бажана, А. Малышкі, У. Няходы і многіх іншых аўтараў.
Апошні раздзел экспазіцыі раскрывае асаблівасці жыцця і творчасці пісьменніка. У аўтабіяграфічных дакументах, успамінах сучаснікаў, літаратуразнаўчых і энцыклапедычных артыкулах чытач знойдзе шмат цікавага пра асобу А. Бялевіча.
Усяго на выстаўцы сабрана звыш 150 дакументаў.
Кантактны тэлефон: (8 017) 293 27 16.