З 25 чэрвеня па 19 ліпеня ў зале нотных і аўдыядакументаў (пам. 305) арганізавана выстаўка “Слухаючы голас часу”, прысвечаная 90-годдзю з дня нараджэння беларускага кампазітара, педагога Г.М. Вагнера (1922–2000).
Творчасць Генрыха Матусавіча Вагнера – гэта плён яго мастацкага роздуму пра жыццё, плён унутранай патрэбы выказаць нешта запаветнае, назапашанае ў душы. Як і кожны сумленны мастак, ён адчуваў неабходнасць сказаць у музыцы сваё слова пра перажытае ім самім і краінай. Старонкі біяграфіі кампазітара апалены вайной, менавіта таму вядучае месца ў яго творчасці заняла патрыятычная тэматыка – вакальна-сімфанічныя паэмы “Вечна жывыя” (1959), “Героям Брэста” (1975), за якую кампазітар атрымаў прэмію Ленінскага камсамола Беларусі ў 1976 г., опера “Сцежкаю жыцця” (1977) і інш.
Творы Г.М. Вагнера ўражваюць сваёй разнастайнасцю: балеты, хоры, рамансы, песні, музыка да кінафільмаў, драматычных, тэлевізійных і радыёспектакляў, сімфанічныя і камерна-інструментальныя творы, фартэпіянныя мініяцюры, апрацоўкі ўзораў рускага, беларускага, польскага, румынскага фальклору. Яны захапляюць слухачоў дынамікай руху, нязгаснай энергіяй, жыццялюбствам і аптымізмам, адкрытай эмацыянальнасцю. Дыяпазон вялікі, і колькасць даволі значная. Кампазітар з’яўляецца аўтарам першай у Беларусі тэлеоперы “Ранак” (1967).
На выставачных паліцах прадстаўлены нотныя зборнікі твораў Г.М. Вагнера, а таксама аўдыядакументы з фондаў Нацыянальнай бібліятэкі Беларусі. Наведвальнікі выстаўкі маюць магчымасць працаваць з дакументамі экспазіцыі, у тым ліку праслухоўваць аўдыязапісы.
Дапаўняюць экспазіцыю публікацыі з перыядычных выданняў пра кампазітара і яго творчасць.
Кантактны тэлефон: (+375-17) 293-27-52.
 |
 |
 |
 |
 |
 |
