З 13 лістапада па 20 снежня ў зале дакументаў па мастацтве (пам. 306) праходзіць кніжна-ілюстрацыйная выстаўка “Сад жывапісца”, прысвечаная 175-годдзю з дня нараджэння французскага мастака Клода Манэ (1840–1926).
Імя мастака стала практычна сінонімам імпрэсіянізму. Менавіта яго карціна “Уражанне. Усход сонца”, рэпрадукцыя якой заняла цэнтральнае месца ў экспазіцыі, дала назву ўсёй мастацкай плыні, а сам ён быў найбольш паслядоўным, плённым і бескампрамісным сярод прадстаўнікоў свайго пакалення.
Жывапіс К. Манэ – гэта ўзвышанае пакланенне перад прыродай, імкненне перадаць прыгажосць свету сваім асобым спосабам. Яго своеасаблівае мастацкае бачанне стала асновай для жывапіснай манеры імпрэсіяністаў, якія перадавалі непасрэднае ўражанне ад прыроды, бачачы ў ёй прыгажосць зменлівасці і бязмежнасць, узнаўлялі зрокавае адчуванне яркага сонечнага святла, карыстаючыся палітрай з чыстых незмяшаных фарбаў.
На выстаўцы прадстаўлены альбомы і паштоўкі з рэпрадукцыямі твораў мастака. Сярод іх серыйныя работы – кампазіцыі “Таполі”, “Стагі сена”, выявы Руанскага сабора і інш. Асаблівую ўвагу прывабіць стэнд, прысвечаны самай знакамітай серыі позніх пано “Німфеі”, дзе адлюстраваны віды сажалак з гарлачыкамі, што плаваюць у іх.
Дапаўняюць экспазіцыю кнігі і артыкулы, якія знаёмяць з біяграфіяй і этапамі творчага шляху Клода Манэ.
Усяго на выстаўцы прадстаўлена больш за 50 дакументаў.
Кантактны тэлефон: (8 017) 293 27 53.
 |
 |
 |
 |
 |
 |
 |
 |
 |
