10−11 лістапада ў Маскве прайшла пятая штогадовая Усерасійская нарада па пытаннях работы з кніжнымі помнікамі, у якой бралі ўдзел супрацоўнікі Нацыянальнай бібліятэкі Беларусі.
Мэта нарады, якая адбылася ў Расійскай дзяржаўнай бібліятэцы, − абмеркаванне пытанняў прававога і арганізацыйнага забеспячэння работы па выяўленні і ўліку, захоўванні і выкарыстанні асабліва цэнных аб’ектаў кніжнай культуры, праблем фармавання і даступнасці электронных калекцый кніжных помнікаў.
Ад Нацыянальнай бібліятэкі Беларусі ў анлайн-рэжыме на нарадзе выступілі намеснік дырэктара па навуковай рабоце і выдавецкай дзейнасці Аляксандр Суша (даклад "Рэаліі і перспектывы стварэння Дзяржаўнага рэестра кніжных помнікаў Рэспублікі Беларусь") і загадчыца навукова-даследчага аддзела кнігазнаўства Галіна Кірэева (даклад "Асноўныя кірункі работы па стварэнні Дзяржаўнага рэестра кніжных помнікаў Рэспублікі Беларусь").